Shillong, Naiwieng 04: Ki nongtrei jong ka EMRI-108 ki la pynpaw ia ka jingbym sngewhun halor ka jingpyntip jong ka Myntri ka Koit ka Khiah ban pynkiew ia ka jingsiew bainong kaba 7 percent na ka jingsiew bainong kaba ki ioh mynta.
U President jong ka Meghalaya EMRI Workers Union (MEMRIWU) u Bah Roypar Kharraswai ha ka jingiakren bad ki lad pathai khubor hadien ba la wai ka jingialang ha ka sngi Saitjaiñ u la ong, “ha ka jingialang mynta ngi la iakren ia ka jingsiew tulop hadien ba ka Sorkar ka la ong ba kan sa pynkiew da 7 percent ia ka Annual Increment na ka jingsiew tulop kaba mynta. Tang shu ioh jingtip ia kane, ma ngi ki nongtrei ngi la khih jingmut namarba ka jingpynkiew tulop ka long kaba rit shaba palat.”
“Wat ha rilum Garo ki nongtrei jong ka EMRI-108 ruh ki la pynlong ia ka jingialang namarba ka jingtyrwa ban pynkiew tulop ka long kaba rit shaba palat,” long u Bah Kharraswai.
“Ngim hun ia ka jingpynkiew tulop kaba 7 percent bad ngi la rai la kumno kumno ka Sorkar kaba la pyniaid hi ia ka EMRI-108 kan ai ka One Time Enhancement mynta shi snem bad kan sa ai pat da ka Annual Increment manla u snem, ia kata ngi pdiang,” u la ong bad bynrap, “ia ka rukom siew tulop jong ngi ba ladep pynkhreh ngin sa rah sha ka Sorkar bad lada kam pynkiew ngim banse ban iaid da kawei pat ka lynti,” la ong une u nongialam ka MEMRIWU.
U la iathuh ruh ba ka jingialang ka la iakren sani halor ki jingdawa jong ka Union kiba la pdiang da ka Sorkar Jylla khamtam ha kaba iadei bad ki jingmyntoi jong ki nongtrei, bad khamtam eh ha kaba iadei bad ka jingpynpaw jong ka Sorkar ban kham pynbun ia ki nongtrei bad ia ki kali Ambulance.
Haba kylli, u la ong, “ha ka jingiakren naduh kaba sdang, ka Union ka la dawa ia ka Sorkar ba kan shimti ban pyniaid hi ia ka EMRI-108 hynrei ka Sorkar hi ka pyni bun ki daw hynrei watla katta ngi ieh ia ka jingstad jong ka Sorkar hynrei ka jingdawa ka long beit ba ka Sorkar kan shimti ban pyniaid hi ia kane ka Emergency Service.”
“Ngi kwah ba ka Sorkar kan pynheh ia ka jingsiew tulop bad ngin trei ruh hangne da ka jingsuk mynsiem. Ngim kwah shuh ba kine ki jingjia kiba ladep kin dang jia hadien habud. Ngi buh beit hakhmat ka jingstad ka Sokrar ba kan pynbiang ia ki jingdonkam jong ngi,” u la ong.’
Dang shen, ka Myntri ka Koit ka Khiah ka la pyntip ba ki don 7 tylli ki Kompeni kiba la thep kyrteng ban shimti ia ka EMRI-108 bad na kine, lai tylli ki la shah jied ban thep ia ka Tender. Kine ki long ka Global Health Services, ka Medulance bad ka Chikitsa.
“Ka jingkwah jong ngi ia ka kompeni ka dei ban pyniaid bha i aka kam shakhmat bad ka Sorkar ka dei ban don beit hapdeng ban bishar. Hynrei haduh mynta hi ngim pdiang ia ka jingaiti ia ka EMRI-108 ban pyniaid da ka Kompeni,” u la ong.
“Lada ka Sorkar ka lah ban pyniaid hi ka lah suk namarba la shi snem ka la iaid beit ka kam,” u la ong bad kynthoh, “ym dei ba ka Sorkar kam lah hynrei ka don da kawei pat ka jingthmu haba ka ai wai sha ka kompani, lehse ka lah ban lolng na ka bynta ka jingiohnong jongno re jongno hynrei ym dei na ka bynta ka jingiohnong jong ka jylla.”
Haba iathuh ba ka Union ka la wad jingtip shaphang ki lai tylli ki Kompeni kiba thep Tender ban shimti ia ka EMRI-108 ha Meghalaya ula ong, “ngi la wad bniah, ka Medulance ka don ka dak sniew (Black Remark) ba kam lah ban siew tulop ia ki nongtrei ha ka por Covid-19. Ngi lap ia kata ka rekod. Ka Global Health Service ka iateh lok bad ka UKSSA. Ka UKSSA ba la pyniaid ia ki 108 Ambulance bad 102 ha Delhi bad ha u 2018 ka la don ka jingiakhih jong ki nongtrei ba ka kompeni kam shym la siew tulop ia ki nongtrei namarba ka Sorkar kam ai pisa sha ka UKSSA ba ka rukom pyniaid kam iahap bad ki kyndon pyniaid ba la buh,” la ong u Bah Kharraswai
“Ka Chikitsa ka don hapoh ka jingtohkit jong ka CBI ha Rajasthan ba ka pyniaid ia ki kali Ambulance. Ka rekod jong kine ki lai tylli ki dei kiba sniew. Ka jingjied jong ka Sorkar ia kine ki lai tylli ka don eiei sha lyndet. Ngi diaw ban iohi ba ka Sorkar ka leh bakla ha kane ka jingjied. Lada ka Sorkar ka pyniaid hi kan bha shibun. Ka sorkar kam dei ban iapeiñ ban aiti ia ka Emergency Health Services sha ki kompeni ba la don dak sniew,” la dawa une u nongialam ka MEMRIWU.
