Shillong, Nailur 09: U Symbud Myntri Rangbah ka jylla u ba khmih ïa ka tnat District Council Affairs (DCA) u Bah Prestone Tynsong ha ka sngi baar u la ong ba ka sorkar kam don kano kano ka jingthmu ban kyntur ïa u pud u sam jong ki bor ki 3 tylli ki autonomous district council (ADCs) da ka jingthmu ban ai ki lad jingïarap pisa.
U la ong ruh ba ka jingthmu ka sorkar ban thaw ïa ki state committee bad ki 3 tylli ki sub-committee ka long ban pynthikna ïa ki lad jingïarap pisa sha ki ADC.
Haba jubab ïa ka jingïatai ba la wanrah da u MLA ka VPP na Nongkrem u Bah Ardent Basaiawmoit, u Bah Tynsong u la ong ba kine ki committee kin sa don ki jingïakren bad ki ADC, ban pan ki jingmynjur bad ban wanrah ruh ïa ki jingkylla kum ka recruitment policy, ki kam shakri, bad kiwei pat ki kam.
“Ki kyndon jong kine ki committee ki la thew ba kim don ki agenda barieh kumba la kdew da u MLA ka Nongkrem, uba la kynnoh ba kane kadei ka kam ban pynïaid na sha lyndet ïa baroh ki ADC, ha kaba kane kam dei kaba shisha,” u la ong.
U Bah Tynsong u la pynpaw ruh ïa ki jingeh ba mad da ki ADC halor ki kam ban pynmih pisa bad ki jinglut jingsep jong ki.
U la ïathuh ruh ba ka Jaiñtia Hills Autonomous District Council (JHADC) ka lah ban pynmih pisa ha ka shisnem tang kumba T. 68.98 klur hynrei ka jingdonkam ban siew tulop ïa ki nongtrei ka long T. 102 klur, ha kaba kane ka la wanrah ka jingduna pisa kaba T. 33.02 klur.
“Kumjuh ruh ha GHADC, ka jingpynmih pisa ka long T. 14.15 klur katba ka jingpynlut ha ka jingsiew tulop ka long T. 84 klur bad kane ka wanrah ka jingduna pisa kaba T. 69 klur. Kane ka la jia manla ka snem. Kane ka jingeh ka khlem sdang tang ha ka snem 2018-2019, hynrei ka la ïai kiew na ka por sha ka por. Ha KHADC, ka jingïoh pisa ka long T. 46.11 klur bad ka jingpynlut tang ha ka jingsiew tulop ka long T. 72 klur bad ka jingduna pisa pat ka long T. 25.9 klur ha ka shisnem,” u la ong.
“Haba peit ïa kine ki jingeh, ym banse ïa ka sorkar ba kan shimkhia hynrei ngi khlem ong pat ba ka sorkar kan siew tulop haduh bakut hynrei ngin ai pat kum ki lad jingiarap pisa na ka bynta jong ki,” ïathuh u Symbud Myntri Rangbah.
U la ong ruh ba kane ka jingthmu ka sorkar ka long ban don ki jingïasyllok hapdeng ka sorkar bad ki ADC.
Haba ïadei pat ki jingeh ba mad da ki MDC na sor, u Bah Tynsong u la ïathuh ba ka sorkar ka la poi sha ka jingshim rai ban ïasyllok bad ki MDC halor ki jingtyrwa ban buh ïa ki skhim lyngba ka 15th Finance Commission.
“Ka 15th Finance Commission ka la mang lyngba ki fund ka urban affair kaba la pyntreikam da ka municipal board, hynrei ka municipal board kan ïa syllok bad baroh ki MDC kiba hap hapoh ki jingtyrwa skhim hapoh ki jaka sor. Ïa kane ka rai la shim ha ka 20 tarik u Jymmang, 2025 ha ka jingïalang bad ki MDC na ki constituency kiba don ha sor kiba kynthup na JHADC bad KHADC,” ong u Bah Tynsong.
“Nga thikna ba mynta ka 15th FC ka la kut. Haba ki la wan jngoh ki la khot ïa baroh ki ADC. Ka sorkar jylla ka la wanrah ruh ïa kane ka mat hakhmat ka 16th FC ha ka por ba ki wan sha Shillong, ban ïarap lem ïa kane ka kam naba bun na baroh ki 16th FC ki wan lyngba ka Ministry of Panchayati Raj hynrei hangne ngim don ïa ka Panchayati Raj,” ong u Bah Prestone.
Haba wanrah ïa kane ka mat ïakren u MLA ka Nongkrem u Bah Basaiawmoit u la buh ka jingkylli halor ka jingthmu bas ha lyndet jong kane ka kam ban tuklar ïa ki kam pisa jong ki ADC.
U Bah Basaiawmoit u la pynpaw ruh ïa ka jingbym lah ban shim khia jong ka sorkar ban pynbeit ïa ki jingeh ba mad da ki nongtrei GHADC bad ki MDC na ki jaka sor.
U la ong ba kine ki MDC ki la shah pynduh ïa ki scheme bad ki lad jingmyntoi na ka daw ka jingbym lah ka sorkar ban shim khia halor kane ka kam ban pynbeit bad ka Ministry.
Haba ïashim bynta lang ha ka jingïatai u nongïalam ka liang pyrshah u Mukul Sangma u la kren ruh halor ka text settlement agreement ba la soi hapdeng ka sorkar pdeng, ka jylla bad ka Achik National Volunteers’ Council (ANVC) bad ANVC (B).
“Ka bor kaba wan lyngba ka Sixth Schedule ha kaba ïadei bad ka primary education la dep ban shim khia bad shimti da ka sorkar,” u la ong.
