Shillong, Rymphang, 19: U Myntri Rangbah ka jylla u Conrad K. Sangma ha ka sngi Palei u la pyntip hapoh ka ïingdorbar thawaiñ ba ka Sorkar kan sa bishar bniah biang bad ban wanrah ïa ka jingpynbeit thymmai ïa ka Meghalaya Residents Safety and Security Act, 2016 (MRSSA) ban weng ïa ki jingeh halor ka jingwan buhai shnong beaiñ bad ban pynthikna ba ka aiñ kan ïaid beit.
Haba jubab ïa ka Resolution ba la wanrah da u Nongïalam ka Liang Ryrshah u Mukul Sangma, u Myntri Rangbah u la ong ba ka jylla kan sa bishar bniah biang ïa kane ka aiñ bad kan sa wanrah ïa ki jingpynbeit thymmai kiba donkam hadien ba la ïamir jingmut bad ka Sorkar Pdeng bad ka Parliament.
Lyngba ka Resolution, u Mukul Sangma u la kyntu ïa ka Sorkar ban pyndep noh mardor ïa ka jingpynieng ïa ki Facilitation Centre ha ki Entry bad Exit Point khnang ban dup pyntreikam pura ïa ki kyndon ba pyrkhing katkum ki kyndon ba la kdew ha ka MRSSA, 2016.
“Nga pynthikna ïa ka Ïingdorbar ba ngin bishar bniah biang ïa ka bynta baroh kawei bad ban peit kumno ngin lah ban wanrah ïa ki jingpynbeit thymmai ha ka MRSSA ka ban lait na ka jingshah khanglad ha ka Ïingbishar bad kumjuh ha ka ka Sorkar India bad ha ka Parliament”, la ong u Conrad Sangma.
U la pyntip sha ka Ïingdorbar ba ka tnad Kam Pohïing jong ka Sorkar Pdeng ka la bthah ïa ka Sorkar Jylla ban bishar bniah ïa ki kyndon jong ka aiñ. “Ka MHA ka la bthah ïa ngi ban bishar bniah biang ïa ki bynta jong ka MRSSA. Ngi dang ïa treilang bad ka tnad Aiñ, u Advocate General bad ka tnad Kam Pohïing ban ngam jylliew bad ban bishar bniah ïa ki sohkyrdot jong ka aiñ bad ki kyndon”, u la ong.
U Myntri Rangbah u la bynrap ba ka Sorkar ka dang wad ruh ki lad ki lynti ban pynskhem ïa ki Entry bad Exit Point lyngba ka Immigration and Foreigners Act, 2025, ba la tyrwa, da kaba pynrung ïa ki kyndon kiba pyrkhing.
Haba pdiang sngewbha ïa ki jingai jingmut na ki dkhot, u la ong ba ka Sorkar ka plie ïa ka jingïamir jingmut bad ki seng saiñpyrthei bad ki kynhun bapher bapher ban pynkhlaiñ ïa ka aiñ.
Haba pynpaw ïa ka mat kaba kham ïar, u Conrad Sangma u la kdew ba ki lad kamai bunsien ki pynlong ïa ka jingwan buhai shnong kiba nabar. “Ki wan shane namar ka ïoh ka kot; ki ïoh kam ïoh jam”, u la ong.
Kham mynshwa, u Myntri Rangbah u la kdew ïa ki jingeh ba ka jylla ka ïakynduh ha kaba pyntreikam ïa ka MRSSA, da kaba kdew ïa ka rai jong ka Ïingbishar High Court kaba la pynsangeh ïa ki katto katne ki kyndon jong ka aiñ namar ka jingbym don ki kyndon ba kyrpang kiba kdew ïa ki kyndon ban pyrkhing ha ki Entry bad Exit Point.
“Ka jingthmu ha lyndet jong ka MRSSA, 2016 ka long kaba bha bad kaba dei, hynrei ngi la shah teh hapoh ki jingteh jong ki Aiñ, ki aiñ bad ki kyndon ba bun jait ba la thaw da ka Parliament bad ka Riti Synshar,” u la ong.
U la kdew ruh ba ka Ïingbishart High Court ka la pynsangeh noh ïa ka jingpayntreikam ïa ka MRSSA ha u bnai Nohprah, 2021 bad hadien ka la pynkut noh ïa ka PIL kaba ïadei bad kane ha u bnai Jymmang, 2022 hadien ba ka la kheiñ ïa kane ka mat kum ka jingeh ha ka koit ka khiah kaba ïadei bad ka jingpeit bniah ïa ka jingpang khlam COVID-19.
Da kaba pynpaw ïa ka jingsngewhun halor ka jingpynthikna jong ka Sorkar, u Mukul Sangma u la weng noh ïa ka Resolution jong u da kaba ong ba ka jingïakren ka pynpaw ïa ka jingkut jingmut lang ban weng ïa kane ka jingeh.
