Shillong, Naitung, 28: Ka St. Anthony’s Higher Secondary School ka long ka Team Champion ha ka liang jong ki shynrang katba ka Auxilium Girl’s Higher Secondary School ka la long ka Team Champion ha ka liang jong ki kynthei ha ka 31st State Level Inter School Karate Tournament 2025 kaba la long naduh ka 24 tarik haduh ka 26 tarik, Naitung, 2025 ha Multipurpose Indoor Hall, SAI, STC, NEHU, Shillong.
Ka St. Anthony’s Lower Primary School ka la wan ha ka kyrdan kaba ar ha ka liang jong ki shynrang bad ka Providence School ha ka liang jong ki kynthei.
Ïa kane ka lympung ïalehkai la pynhap pyrda da u Myntri ka Sorkar Jylla u Bah Paul Lyngdoh ryngkat ka jingdon lang jong u General Secretary jong ka Meghalaya State Olympic Association (MSOA) u Bah Finely K. Pariat bad u Chief Accounts Officer (CAO) ka Meghalaya Energy Corporation Limited (MeECL) u Bah Aiborlang Shabong kiba la long kum ki Symbud Kongsan.
Haba phai sha ki nongjop ha kane ka lympung ïalehkai, ïa ka nam Best Karateka ha ka kyrdan Boys Junior la ïohrah da u Royal Jayden Laloo na ka Seven Set Higher Secondary School bad ha ka Best Karateka ha ka kyrdan Boys Senior la ïoh rah da u Daniel Dabiangbha Warjri na St. Anthony’s H.S. School, katba ha ka liang jong ki kynthei ka Princey A. Blah Pohti kaba pule ha Pine Mount School ka la ïohrah ha ka nam Best Karateka ha ka kyrdan Girls Junior bad ka Iwannaki L.Khongji kaba pule ha St. Anthony’s H.S. School ka la ïohrah ïa ka nam Best Karateka ha ka kyrdan Girls Senior.
Ha kane ka lympung ïalehkai ki la don haduh 748 ngut ki khynnah skul kiba la ïashim bynta ba kynthup ïa ki 398 ngut ki shynrang bad 350 ngut ki kynthei na ki 104 tylli ki skul kiba don ha ka jylla baroh kawei.
