Shillong, Risaw, 13: U Secretary jong ka Raid Shabong u Bah Nikelson Khongmawloh u la pynpaw ïa ka jingsngewsih halor ka jingpynmih khubor ha ka 9 tarik mynta u bnai da uwei na ki nongshong shnong jong ka Raid u Bah Phrangkupar Thabah kat haduh ba ka la ktah mationg bad pynjah burom ïa u Syiem jong ka Hima Khyrim u Pa’iem Dr. Balajied Sing Syiem da kaba kynnoh ba u Syiem u la pynkylla Ri Kynti ïa ka Ri Raid hapoh ka Raid Shnong shi miet shi miet.
Ha ka jingïakren bad ki lad pathai khubor ha ka sngi Saitjaiñ u Secretary jong ka Raid Shabong u la ong ba u Syiem jong ka Hima Khyrim u tip bha ïa ka riti ka dustur, ïa ka niam ka rukom namarba u dei uba dang bat ïa ka hok ka sot ka shikyntien bad uba tip bniah bha bin pa bin ïa ki riti ki dustur hapoh ka Hima.
Halor ka jingkynnoh jong u Bah Phrangkupar Thabah ïa ka Kur Khun Longtrai Lai Kynthei, u Secretary jong ka Raid Shabong u la ong, ‘ka Kur Khun Longtrai Lai Kynthei ka dei ka thymmei ha ka raid Shabong ka pynïaid ïa ka niam ka rukom, kaba bat ïa ka riti ka dustur bad ka pynïaid ïa ka khyndew ka shyiap. Naduh myshwa haduh mynta ïa ka pateng Sordar la pynmih na kane ka kpoh.”
“Dei ha u snem 2005 ka wan ka elekshon jied Sordar katkum ka Saw Raid Act, dei na kata ka daw ha ka jingïohi jong ki longshwa manshwa ha ka Raid Shabong da ka jingïohi jngai, ki kwah ban buh rekod ha u Syiem khnang ban neh ki nongrim jong ka hok bad ka jingshisha hapoh ka Raid. Ïa ka rekod ba la ai ha u Syiem kam don kano kano kaba thaw thymmai hynrei ki dei kiba ju long bad kiba la long lypa naduh u menbarim haduh mynta. Hapoh ka Raid Shabong ki don ki khyndew Ri Niam, ki khyndew kit synñiam, ki khyndew ri kynti jong ki paidbah khlem da jer lut bad u Syiem u tip bha ïa kine baroh,” u la ong.
“Kiba pyrshah ïa ka riti ka dustur ki ong ka mat dei ka kot jot jong u Syiem, hynrei, kine kiei kiei ki sdang ka dei na ka jingpyntrei ïa ka projek shna pynheh surok jong ka National Highways and Infrastructure Development Corporation Limited na Shillong sha Dawki,” la ïathuh u Secretary.
U Secretary u la ïathuh ruh ba kine ki kynrum kynram hapoh ka Raid ka la poi sha ka miej jong ka District Council Courts jong ka Khasi Hills Autonomous District Council (KHADC). Ha ka hukum ba la pynmih ha ka 20 tarik, Nailur, 2024, ka District Council Courts ka la bthah ba dei ban pynneh ïa ka Status Quo.
