Shillong, Naiwieng, 27: U MLA ka BJP na Pynthorumkhrah Constituency u Bah Alexander L. Hek ha ka sngi Palei u la phah da ka jingthoh sha u Myntri Rangbah ka Jylla Goa u Dr. Pramod Pandurag Sawant ban pynpaw ïa ka jingpyrshah halor ka jingthmu ban pynlong ïa ka Tales of Kamasutra bad ïa ka lehkmen Christmas ha kajuh ka por ha ka jylla Goa katkum ba la pynsaphriang ha ka rynsan Social Media ïa ka prokram.
Ha ka shithi, u Bah AL Hek uba long ruh u Chairman jong ka State Government Programme Implementation & Monitoring Committee (SGPIMC), Sorkar Meghalaya, u la pynpaw ba katkum ka prokram la pyni ba ka seng kaba thmu ban pynlong ïa ka Tales of Kamasutra bad ïa ka lehkmen Christmas ha kajuh ka por ha Goa ka dei ka kynhun ba la tip kum ka Bhagwan Shree Rajnesh Foundation ïa kaba kum ka imlang ka sahlang bad ki kynhun niam Khristan kim lah satia ban pdiang da leilei ruh em ïa kane ka tamasa.
U Bah Hek u la kyrpad ïa u Myntri Rangbah ka Goa ba un phah tohkit bad ban wad ïa ka jingshisha la kane ka prokram ka dei neem kaba shisha bad lada lap ba ka long kaba shisha dei ban leh da kaba tyngeh bad ban pynshitom katkum ki kyndon jong ka aiñ ïa kiba donkti ban pynlong ïa kane ka prokram.
