Shillong, Naitung 31: U nongïalam ka liang pyrshah u Mukul Sangma, u la pynpaw ka jingsngewskhem ha ka Trinamool Congress (TMC) bad ka Voice of the People Party (VPP) ban pynpaw pyrthei bad sei madan ïa ki jingshah kynnoh ba kane ka sorkar kadei kaba pyrkhat tang ïalade bad ki prokram kiba long pyrshah paidbah bad ki kam kiba ka la leh bakla.
Wat hapdeng ka jingdon ki dkhot ka liang pyrshah hapoh Ïingdorbar thaw aiñ ha ka jylla ka la duna sha ka 9 ngut hadien ba u MLA ba marwei ka Congress na Mylliem u Bah Ronnie V Lyngdoh u la pynïasoh noh sha ka NPP, u Sangma u la ong ba ka jingdon ka TMC bad ka VPP ka la biang ban ïakren ïa ki jingeh bad ki jingleh bakla jong ka sorkar.
Haba jubab ïa ka jingkylli jong ka jingpyrshang ka NPP ban khñiot ïa ka sur jong ka liang pyrshah, u Myntri Rangbah barim u la ong, “ki lah ban don kane ka jingpyrkhat kaba ki kwah hynrei phin ïohi pat ba ka liang pyrshah ka sah hi ka liang pyrshah, katno ngut ki dkhot kiba ngi don ha ka liang pyrshah, na ka TMC bad VPP ka la biang pura ban ïakren ïa kiei kiba la ïohi mynta bad ban pynpaw pyrthei ïa baroh ki jingkynnoh ba pyndonkam bakla kaba ki la pyntreikam. Watla ki don kata ka rukom sngew kaba ym shai kaba ki dang ïaibteng hynrei ki la bakla.”
“Phin sa ïohi ha ka por kaba biang ba ngin sei madan bad ban thad paidbah ïa ki agenda ba pyrkhat tang madale, ki kam pyrshah paidbah kane ka sorkar. Nga kren da kaba shai ba kumno ïa ka bor la pyndonkam bakla bad kaba pyndonkam bakla da kaba ai daw na ka bynta ka bha ka miat jong ka jylla,” u la bynrap.
Haba phai sha ki jingkylla ha ka saiñ pyrthei ba la paw pyrthei ha ka jylla, u Sangma u la ong, “Ha ka jingshisha ka la don ka jingkylla ka saiñ pyrthei ha ka jylla. Ka jingkylla ka saiï pyrthei ha ka ri ka la wan ha ki phew snem kiba khlem ïaid lang bad ki jingkordor ka rukom synshar paidbah.”
U la banjur halor ka jingdonkam na ka bynta ki paidbah ban peitngor ïa kane ka jingkylla ba thymmai ha ka saiñ pyrthei bad ban pyndonkam bha ïa ki hok da ka jingkitkhlieh ha ka por ba ki jied ïa ki nongmihkhmat.
U Sangma u la kyntu ïa ki paidbah ban pyndonkam ruh ïa ka Right to Information (RTI) Act ban sei ïa ki jingshisha shaphang ki rai bad ki kam ka sorkar. U la kdew ruh da kaba shai halor ka jingdonkam ban tohkit halor ka jingthung ïa ki consultant bad kiwei ki jingthung kiba ai jingmyntoi ïa kiwei.
“Phin sa sngewlyngngoh ba katno ngut la thung ïa ki consultant bad mano ba ïoh jingmyntoi na kine ki consultant? Kumta dei ban wad hi dalade. Wad mano ba ïoh jingmyntoi na kine ki consultant? Ka rukom thung ïa ki, bad katno ka pisa ba bun ba la pyndonkam,” bynrap u Sangma.
U Sangma u la pynpaw ka jingsngewskhem ba ka liang pyrshah kan leh la ka kam bad ban pynpaw pyrthei ïa ki jingleh bakla ka sorkar.
U la ong ba ka sorkar kam lah ban bteng bad kane ka jingbym shai bad ka liang pyrshah kan leh ïa ka kam ban pynpaw ba kadei ka jingkitkhlieh jong ki halor ki kam ba ki la leh.
“Dangshen phi la ïohi ïa ki kam ba ïadei bad u dewïong, kaba dei ka khana kaba phylla. Baroh ki kwah ban ïada ïa baroh ki kam ba bakla kiba la jia ha ka jylla Meghalaya. Kumta ka shong ha ki paidbah ban khmih bniah bha ïa ki jingthmu ba kongsan bad ki kam ba hakhmat jong ka sorkar,” ong u LO da kaba bynrap, “Ka jingpyrshang ka sorkar nga lah ban ïohi ba ki la wanrah kawei ka kam hadien kawei pat ban pynklet ïa ki kam kiba kongsan, kiba don jingktah ïa ka bha ka miat ka lawei jong ka pateng ban wan.”
Halor ka jingkylli ba kumno ka TMC kan bat ïa la ki jong ki dkhot na ka jingpyrshang khring ka NPP, u Sangma u la ong, “Sa shisien, kumta nga ong balei ngi jied ïa ki nongïalam bad ki paralok haba ngi leit shakhmat bad lada phi tip ba ynsa don katto katne ki ban sa phet krad ha shwa ban siat ïa u kuli bad kumta phin tip la phin ïalam ryngkatlang ïa u ne em sha ka laiñ ba hakhmat.”
Haba ong ba ka saiñ pyrthei ka dei ka kam kaba eh, u la bynrap, “Ban jied ïa ki paralok kiba dei kadei ka kam kaba hap ban ïakhun manla ka sngi, naba u ksuid u pynshoi manla ka 24×7, ngi politician ngi hap mad ïa kine ki jingïaleh ha ka saiñ pyrthei kaba ïatan tyllai.”
