Shillong, K’lyngkot, 17: Ka VisioNxt Project, ha ka jingïatreilang bad ka National Institute of Fashion Technology (NIFT), Tnad Textiles, Sorkar India, kadei ka sienjam ba kyrpang ban pynkupbor ïa ki nongshna tiar bad ki nongsaiñdur jong ka ri. Ka jingthmu jong kane ka projek kalong ban pynkhreh ïa baroh ki bynta ba ïadei bad ki nongsaiñdur, ki nongshna tiar bad ka kam pynwandur ïa ki jaiñ na ka bynta ka jingïakop ha ki rynsan shabar ri.
Ka NIFT Shillong ka la pynlong ïa ka jingïalang bad ki lad pathai khubor halor kane ka projek ha ka 17 tarik Kyllalyngkot 2025. Ha kane ka prokram, ka Institute ka la wanrah ïa ka VisioNxt Project bad ïakren shaphang ki jingthmu jong ka, ki jingjop bad ki jingpynkhreh ha ki por ban wan. Ha ka jingïalang bad ki lad pathai khubor, la kren shaphang ki mat ba kongsan jong ka projek, la pyntip ba kadei ka sienjam ba kyrpang na ka bynta ban pynïasoh ïa ki nongsaiñdur bad ki nongshna tiar jong ka ri bad ki teknoloji kiba katkum ka juk mynta bad ki jinglong jingman ha kylleng ka pyrthei.
Hapoh ka VisioNxt Project, la wanrah ïa ka lad ban peit lypa ïa ki jinglong jingman ha ka ri da kaba pyrkhat ïa ka deiriti jong ka ri bad ki jingdonkam ha ka thaiñ. Ka system ka ïarap ïa ki nongshna tiar bad ki nongsaiñdur ban sngewthuh ïa ki jinglong jingman ki ban wan ha ka riam ka beit bad ban pynkylla ïa ki mar jong ki katkum kine ki jingdawa. Kane ka pynduna ïa ka jingshaniah ka kam pynwandur ïa ki jaiñ jong ka ri ha ki kynhun nabar ri bad pynduna ruh ïa ki jinglut.
Ka rukom treikam kaba phakhmat sha ki lad digital bad ki data jong ka projek haduh mynta ka la lum palat 70,000 tylli ki dur jong ki jaiñ bad palat 2,80,000 tylli ki dur. La pyndonkam ïa kane ka data ban peit bniah ïa ka jingitynnad ki riam jong ka ri. Katkum kane, la pynkhreh palat 60 tylli ki kaiphod shaphang ki jinglong jingman jong ka riam ka beit bad palat 10 tylli ki kaiphod shaphang ki rukom riam ha ki samoi ba ïa jan. Ha kajuh ka por, la pyllait paidbah ruh ïa ka kot shaphang ka riam ka beit ha ar jait ki ktien ba la tip kum ka “Paridhi 24×25”, bad haduh mynta la download palat 2,000 sien.
La pyntip ruh ba palat 800 ngut ki samla pule ki la ïoh jinghikai ha ka jingithuh ïa ki jinglong jingman bad ki lad lum ïa ka data hapoh kane ka projek. Kane ym tangba ka la kyntiew ïa ki sap jong ki hynrei ka la plie ruh ki lad ba biang ïa ki ha ka kam pynwandur ïa ki jaiñ.
Sa kawei ka jingjop ba kongsan jong kane ka projek kadei ka jingplie paidbah ïa ka kot shaphang ka riam ka beit kaba nyngkong jong ka India kaba don ha ar jait ki ktien. Ba la tip kum ka “Paridhi 24×25” bad ka web porta ha Taj Mahal Hotel, New Delhi ha ka 5 tarik Nailur, 2025. Haba ai jingkren ha ka jingïalang, u Myntri u la ïaroh ïa ka projek bad ong ba kadei ka sienjam ba kongsan na ka bynta ban pynlong ïa kane ka kam kaba lah ban kyrshan dalade.
U Shankar Kumar Jha (Director, NIFT Shillong), ka Shering Bhutia (Campus Academic Coordinator), u Febby Joint Director, ka Umme Hani, Bah Ksankupar bad baroh ki nonghikai ki la ïadonlang ha kane ka jingïalang bad ki lad pathai khubor. Baroh ki la ïaroh ïa ka projek bad ban jur ïa ki jingmyntoi jong ka. Ha ka jingai jingkren, u Director jong ka NIFT Shillong u la kren shaphang ka jingkongsan ban kyntiew ïa ki projek kiba kum kine. Kadei ka jingsngewsarong ïa ka ri ban pyni ïa ka kam jong ki barikor jong ngi sha ka pyrthei.
Kane ka projek kadei ka sienjam ban pynïasoh ïa ki rukom saiñdur tynrai jong ka India bad ki rukom saiñdur bad ki rukom trei katkum ka juk mynta. Kane ka kyntiew ïa ki nongsaiñdur ha ki iew jong ka pyrthei bad ka pyni ïa ka jinglong ba kyrpang jong ka riam ka beit jong ka India sha kylleng ka pyrthei.
