Shillong, Jymmang, 17: Ki Councillors hapoh ka jingïalam jong u Mukesh Goel, ki la pynbna ïa ka party ba thymmai ba la tip kyrteng kum ka Indraprastha Vikas Party
Ki 15 ngut ki Councillor kiba don hapdeng ka jingbym ïasngew thuh jingmut bad ka Aam Aadmi Party (AAP) ki la resaiñ kum ki dkhot jong ka party ha Delhi bad ki la pynbna ban thaw noh da kawei pat ka seng saiñpyrthei ba thymmai ha ka sngi Saitjaiñ.
Ka jingmih noh jong kine ki 15 ngut ka la nang pyntroiñ shuh shuh ïa ka AAP ba la ïalam da u Kejriwal ha Delhi, tang hapoh khyndiat bnai ba u la mad ïa ka jingshah rem ha ka elekshon sha ka Iingdorbar Thawaiñ ha Delhi.
Kine ki nongïalam pyrshah ki kynthup ïa u Mukesh Goel, uba long u nongïalam jong ka AAP ha ka Municipal Corporation of Delhi (MCD), ka Himani Jain, bad kiwei kiwei.
“Kumba 15 ngut ki Councillor ki la resaiñ kum kum ki dkhot jong ka Aam Aadmi Party bad ki la thaw da ka party ba thymmai, ka Indraprastha Vikas Party. Watla ngi don ha ka bor, ngim lah satia ban trei na ka bynta ban shakri ïa ki paidbah jong ka Delhi. Ngim lah ban trei na ka daw ka jingïapher jingmut hapoh,” ong u Goel haba kren sha ki lad pathai khubor.
Ka Jain, ka la ïaiban ïa kajuh ka jingkren bad ong ba ym lah ban pyndep ïa ka kam ha ka MCD ha ki ar snem shiteng ba la leit noh.
“Ha ki 2.5 snem, ym don wat tang kawei ru ka kam ha ka Corporation kaba dei ban leh. Ngi don ha ka bor, hynrei ngim shym la leh eiei. Ngi la thaw da ka party ba thymmai namarba ka saiñpyrkhat jong ngi ka long ban trei na ka bynta ka roi ka par jong ka Delhi. Ngin kyrshan ïa ka party kaba trei na ka bynta ka roi ka par jong ka Delhi. Haduh mynta, 15 ngut ki Councillor ki la resaiñ. Bun ki ban dang wan pynïasoh,” ka la ong haba kren sha ki lad pathai khubor.
Bun na ki nongïalam ba la lamkhmat da u Goel ki la mih na ka Congress ban pynïasoh bad ka Aam Aadmi Party shwa ka elekshon municipal ba ladep. U Goel ïalade ruh u la rung sha ka AAP da kaba mih noh na ka Congress ha u snem 2021. U la shakri kum u Municipal Councillor jin 25 snem.
Ka jingphet jong kiba bun ki Councillor na ka AAP ka pynpaw shai ïa ka jingïakynad kaba jur hapoh ka party da ka jingïoh synshar biang ka BJP ïa ka MCD hadien ba ka la jop ïa ka elekshon municipal. Ka AAP kam shym la ïashim bynta satia ha ka elekshon.
 | ReplyForwardAdd reaction |
