Shillong, Nailar, 28: U Myntri ka tnat Jngohkai Pyrthei ka Sorkar Jylla Bah Paul Lyngdoh u la ong shwa ba ka sorkar kan shim ïa kano kano ka rai ka hap ban tih bniah bad ban leh janai khnang ba kan kyrtoh kylla hadien habud.
Kane ka jingkren jong u Bah Paul Lyngdoh ka long halor ka jingdawa jong ka All Meghalaya Tourist Taxi Association (AMTTA) ïa ka Sorkar Jylla ban thaw noh da ka Policy kaba khanglad ïa ki kali kali Tourist kiba nabar ka jylla ban rung sha ki jaka jngohkai pyrthei kiba don ha ka jylla Meghalaya namar ka long kumba knieh noh ïa ka pliangja jong ki nongñiah kali kali Tourist na ka jylla Meghalaya
Ha ka jingïakren bad ki lad pathai khubor ha ka sngi Palei u Bah Paul u la ong, “lada ki jylla kiba marjan ki pynmih da ki jingpyrkhing kiba tyngeh ban khanglad ïa ka jingrung jong ki paidbah na ka jylla Meghalaya mano ban shim ïa ka jingkhlieh.”
Hadien ka jingpynsngew na ka All Meghalaya Tourist Taxi Association (AMTTA) ka Sokar ka la thaw da ka Committee ba la khlieh da u Bah Cyril V.D Diengdoh kum u Chairman bad pynlong ruh ïa ki jingïakren la bun sien ba ki kynhun jong ki nongñiah kali kamai Tourist.
“Hato ki Tourist Taxi Association kin shim ïa ka jingkitkhlieh lada ki nong Meghalaya ki shah khang ban leit sha Airport ne Railway Station ne ban leit wad jingsumar sha ki Hospital kiba don ha Guwahati? Kum ka Sorkar ngi hap ban leh da ka jingkitkhlieh bad ngi khmihlynti ba ki Association kin ïai bteng ban ïasyllok bad ka ka Komiti ba la khlieh da u Bah Diengdoh khnang ban poi sha ka jingïasngewthuh jingmut,” la ong shuh shuh u Bah Paul.
“Kane ka dei ka kam kaba jwat bad dei na kata ka daw kumba saw bnai mynshwa, ka tnat Jngohkai Pyrthei ka la khot ïa ka jingïalang ïa baroh ki kynhun kynthup ruh ïa ki nongïalam jong ki Tourist Taxi Associations,” u la ong.
U la ïathuh ruh ba un sa ïakren ïa kane ka jingpynsngew jong ka kynhun ki nongñiah kali kamai Tourist ynda u Symbud Myntri Rangbah uba khmih ïa ka tnat Kam Pohing Bah Prestone Tynsong u la wan phai sha ka jylla.
“Ka nongrim jong ka Sorkar bad ka tnat Jngohkai Pyrthei ka long kaba shai. Ngi kwah ban pynthikna ba ka kam jngohkai kan pynmyntoi ha ka ïohkam ïohjam jong ki trai shnong bad dei na kata ka daw ngi la pyllait paidbah ïa ka skhm kaba la khot kyrteng “PRIME vehicle scheme” ha kaba 80% la bei pisa da ka Sorkar Meghalaya bad kaba sah ka dei ka ram kaba jem kaba la ai da na ki Bank,” u la ong.
Shuh shuh u la ïathuh ba u dang shu dep shong jingïalang bad u Commissioner & Secretary ka tnat Tourism dang khyndiat sngi. “Naduh mynta ka sngi ngin sa plie noh da ka Portal jong ka tnat Tourism bad da kane ka lad ngi khmihlynti ba kan kyntiew kumba 100 tam ki kali PRIME,” la ïathuh u Bah Paul.
