Shillong, Rymphang, 10: Tang hapoh shisnem palat T. 50 lak ka pisa kaba la shah tuh na ki ar tylli ki ATM jong ka State Bank of India (SBI). Ha ka 21 tarik, Jymmang 2025 ki runar ki la rong tuh T. 28 lak na ka ATM kaba don harud surok bah ha ka shnong Mawkriah, East Khasi Hills District. Dang shen ha ka sngi u Blei mynta ka taiew, ki runar ki la rong tuh sa T. 35 lak na ka ATM kaba don harud surok bah ha Mylliem, East Khasi Hills.
Katkum ka jingïathuh ki Pulit, na ka ATM kaba don ha Mylliem ki runar ki la pyndep ïa ka kam jong ki tang hapoh 7 minit kaba pyni ba ki dei ki nongtuh kiba snar bad kiba tbit bha ha kane ka kam.
Kum ban shu pynkynmaw, ki nongtuh ki lute ïa ka pisa na ka ATM kaba don ha Mawkriah ha ka por kumba 2.30 baje mynstep bad ha kane ka kynti ba mynta na ka ATM kaba don ha Mylliem ruh ki nongtuh ki leit ha ka por, kata, 2:30 baje mynstep. Nangta na ka ATM kaba don ha Mawkriah ki nongtuh ki ot ïa ka ATM da ka pyndonkam da ka Gas bad ha Mylliem ruh ka long kumjuh ki pyndonkam da ka Gas ban ot ïa ka Shutter bad ïa ka synduk jong ka ATM.
Katkum ka jingtip ba la ïohlum, la ïathuh ba haduh mynta ruh ki Pulit kam pat lapdien ïa ki briew kiba donkti ban lute ïa ka pisa na ka ATM ha Mawkriah bad kane ka la mih ka jingkylli hato ki dei kijuh ki briew kiba tuh na Mawkriah bad kiba tuh na Mylliem namarba ka ïa syriem bha bad ka rukom ot ïa ki synduk ATM bad na ka pisa kaba ki la ïoh khung ka pyni shai ba ki dei ki briew kiba la ïoh jingtip lypa ba ki dei ki ATM kiba bun bha ka pisa.
