Kynjoh 30 snem ka KSU Laban Circle
Shillong, Naiwieng, 29: Ka Khasi Students Union Laban Circle ha ka sngi Saitjaiñ ka la rakhe ïa ka jingdap 30 snem naduh ba la seng ha u snem 1995.
Ha kane ka sngi, ka seng ka la pynkup burom ïa ki samla pule kiba la pas bha ha ki kyrdan pule bapher bapher naduh Class-X haduh ka kyrdan Ph.D da ka Maitshaphrang Excellence Award, 2025 bad kynthup ruh ïa ki samla kiba la ïoh khusnam ha ki rynsan ïalehkai sports.
U President ka Khasi Students Union (KSU) Central Executive Council u samla Lambokstarwell Marngar uba la long u kongsan ha kane ka sngi ryngkat u Chairman jong ka North East Students Organisation (NESO) u Bah Samuel Jyrwa bad kiwei kiwei ki nongïalam ka seng ki la sakhi lang ha ka jingpyllait paidbah ïa ka music video jong ka KSU Laban Circle ïa kaba la ai kyrteng, ‘shaei ki Akhia?
Ha kane ka sngi, la pynkup burom ruh ïa ki nongïalam barim jong ka KSU Laban Circle bad la pynskhem ruh ïa ki nongkitkam ba thymmai jong ka Circle na ka bynta ka samoi treikam jong u snem 2025 haduh u snem 2028.
U samla Lambokstarwell Marngar haba kren kum u kongsan u la kynthoh tyngeh ïa ka Sorkar Jylla da kaba ong, kajuh ka sorkar kaba pynsngew bha, kajuh ka Sorkar kaba sympat ïa la ki jong ki para ri.
“Ngi peit ïa ka jinglong jingman khamtam ha kine ki sngi ka jingïam ka jinglynñiar jong ki paradoh parasnam ka dei ka kamram jong ngi ban peitngor. Dang khyndiat taïew ka Sorkar ka pynsawa ïa ki jingput jingtem ha madan Polo bad ki khun samla ki shad mastieh da ka jingkmen. Khyndiat sngi ki jaw ummat ki longkmie ha Khyndai Lad. Kajuh ka Sorkar kaba pynsngewbha kajuh ka sorkar kaba sympat ïa la ki jong ki para ri,” u la ong.
U la ong ruh ba ha ka jingïaid lynti jong ka KSU Laban Circle ka la mad ïa kiba bun ki jingshah tynjuh ban shakri ïa ka imlang ka sahlang bad ïa ka jaidbynriew.
“Ki 30 tylli ki snem kim dei shuh kiba dang shu malu mala hynrei ki dei ki snem kiba la long rangbah samla bad ka dei ka Cirlce kaba la ih,” la ong u samla Lambokstarwell.
“Ka lynti ïaid kaba kumno nangne shakhmat? Ki jingtynjuh kiba thymmai lehse kin wan bad ki mat kiba thymmai kin wan hynrei wei haba dang don ki samla ki ban tynrong ïa ka kam bad ka jingkut jingmut, ki kam kin tyllun ryngkat ka jingsngewrit,” la ong ruh shuh u President ka KSU bad bynrap, “ki nongïalam ki lah ban leit bad ki lah ban wan na kino kino ki shnat treikam, bad ka jingkitklieh hapoh ka KSU ka ju hiar pateng.
U Bah Samuel Jyrwa haba kren kum u Symbud Kongsan u la ong hadien u snem 1987 ka KSU ka la sdang ban pynkha ïa ki Circle bad ïa ki Unit ha kylleng ka Bri u Hynniewtrep.
“Ha Laban la thaw ïa ka Unit ha u snem 1994 bad ha u snem 1995 la pynkha ïa ka circle,” la ïathuh u Bah Jyrwa.
“Ka mynsiem ïaleh, ka mynsiem ieid ri jong ki samla ka Laban naduh Lawsohtun haduh Lumparing ki mih shakhmat ban pynlong mynta kumba ka long,” u la ong.’
Haba pynpaw ka jingsngewnguh ïa ki nongïalam kiba rim bad kiba la khladnoh, u Chairman ka NESO u la ong, “ka jingkynmaw tympang ïa ki bad ki jingshakri jong ki ban bteng bad pynrhem ïa ka Circle kaba treikam bha bad kaba khlain bha ha ka jingtrei kam jong ka.”
“Ha ki lai snem ba la leit noh ka Laban Circle ka la leh bun ki kam kiba ladep bad kiba dang sahteng. Ki jingïaleh ka Laban Circle ki dang bun bha bad ba ki nongkitkam jong ka samoi treikam jong u snem 2025-28 kin nang pynkhlaiñ shuh shuh ha ki snem ki ban dang wan,” la ai mynsiem u Chairman ka NESO.
U Bah Jyrwa u la ai khublei ruh ïa ki samla pule kiba la pas bha shakhmat ha ki kyrdan pule bapher bapher bad ai mynsiem ruh ba kin nang trei shitom shuh khnang ba kin long ki khlur ba tyngshaiñ jong ka ri bad ka jaidbynriew shisien ka sngi.
“Ka jaidbynriew jong ngi ka dei kaba ritpaid bad mynta la bun phew tylli ki snem ngim don shuh kiba pas ïa ka Civil Services Exam. Hynrei ma phi kiba don ka jingkhlaiñ ha ka bor jabieng bad ka jingproh jabieng nga kyntu ba phin trei minot ïa ki jingpule khnang ba kan long ka burom ym tang ïa phi shimet hynrei wat ïa ka ri bad ka jaidbynriew. Ynda la phi lah poi ha kano kano ka kyrdan kan long ka jingïarap ïa ka shnong ka thaw, ïa ka jylla, bad ïa ka jaidbynriew baroh kawei,” la ong u Bah Jyrwa.
“Ha kane ka juk, ki briew kiba stad kiba don ha ki kyrdan bapher bapher ki don la ka jong ka jingieid ïa ka jaidbynriew hynrei nalor kata ngi sngewdonkam ban don ruh ïa u budlum ban ïaleh pyrshah ïa ki jingsniew,” la kyntu u Bah Jyrwa.
“Ngi dei ban don u budlum uba khlaiñ bad kam pher lada ngi hap ban mad ïa ka jingshah pynshitom kaba kumno kumno ruh haba ka jingïatip lem jong ngi kam shah ban leh ngim ju dei ban leh,” u la ong.
“Ki samla kiba don ïa ki sap bapher bapher nang trei shitom bad pynjanai ïa ki sap jong phi ba phin wanrah burom la ka long ha ka rynsan ïalehkai, ha ka put ka tem, ka rwai ka siaw, ka shna dur, ka dro dur kano kano ka sap kaba u Blei u ai ngin pyndonkam hok ïa ka khnang ba kan long ka jingïarap ïa ngi shimet bad ban long ki khlur kiba paw ha ka ri,” la ai mynsiem u Bah Jyrwa ïa ki samla kiba la sakhi lang ha kane ka sngi.
U la kyntu ruh ïa ki samla ba kin long ki akhia kiba bah lyngkor ïa ka jingeh jong ka ri bad ka jaidbynriew ba ka ïakynduh na kawei ka por sha kawei pat.
U la pynkynmaw ruh ïa ki lai tylli ki “K” da kaba ong, “ka ktien thylliej, khein khur khein kha, ka khyndew ka shyiap. Lada ngi lah ban bat ïa kine lai tylli ki “K’, lano lano ruh kan ym synjor shuh bad ngin pynskhem ïa ki lai tylli ki “K” ba kin ïai neh ha ngi.”
