Shillong, Nailur, 16: U President jong ka United Democratic Party (UDP) u Bah Metbah Lyngdoh u la pynksan halor ka rai jong ka party ban pynhiar shuki Myntri ïa u Bah Paul Lyngdoh bad ïa u Bah Kyrmen Shylla, da kaba ong ba kane ka sienjam ka long kum shi bynta ban ïasam lang ïa ka jingkitkhlieh hapdeng ki MLA jong ka party.
Ka UDP ka don 12 ngut ki MLA ha ka Iingdorbar Thawaiñ kaba don 60 ngut ki dkhot.
Haba kren sha ki lad pathai khubor hadien ba ladep shim smai kum u Myntri Sorkar, u Bah Metbah u la ong, “ngi don hangne ban ïaid shakhmat bad ban don ryngkat bad u Myntri Rangbah bad ban bteng ïa ka jingïaid lynti jong ka MDA-2.” Haba kylli ïa ka daw ha lyndet ka jingpynhiar shuki ïa ki arngut ki Myntri, u Bah Metbah u la ong, “kam don kano kano ka daw ban pynhiar shuki ïano ïano, ka shu long ka rukom ban ïasam lang ïa ka jingkitkhlieh bad nga tharai ka dei ka por kaba biang katkum ka jinsngew jong nga ïa kaba la pynpaw ruh da ki MLA bad ka party baroh kawei.”
Shuh shuh u la pynshai ba kam shym la don kano kano ka jingïasoi soskular halor ka jingïasam ïa ka jingkitkhlieh ka ban long mar ar snem shiteng.
“Ngim pat ju don kano kano ka jingïateh, ym pat ju don ha ki por ba la leit noh ruh kaba kum kata, kumta kam shym la donkam ban don ka jingïateh,” u la bynrap.
U Bah Metbah u la ban jur ba ka UDP ka dei ka party kaba ïatylli bad kan ïai neh ruh kumta.
“Ban kham shai bha, kumba long mynta ka sngi bad nga ngeit ba wat ha ki por ki ban sa wan ruh, ha ka party baroh kawei, ngi long kawei, kam don ka jingïapher ne kaei kaei kaba phi ong. Ngi ïatylli bad ngin ïai bteng ban ïatylli kum kawei ka kynhun,” u la ong.
U la pynshai ba ïa kane ka rai ban bujli thymmai ïa ka Kynhun Myntri la shim hadien ba la ïasyllok ïa baroh kiba don bynta, kynthup ïa ki MLA, ki MDC, bad ki nongtrei ha ka party.
“Nga la kren da kaba shai bha ba kane ka dei ka jingmut bad jingpyrkhat jong baroh ki nongshim bynta jong ka party, naduh ki MLA, ki MDC, ki nongtrei jong ka party kiba dei shi bynta jong ka jingpyntreikam bad ïa ka rai la shim tang da kawei ka jingmut,” u la ong shuh shuh.
Haba kylli halor ka jingpep jong u Bah Paul Lyngdoh ha ka jingpynsmai Myntri, u Bah Metbah u laong ba u don katto katne ki kam ba dei u ban pyndep namarba ka dei ruh ka sngi khatduh jong u ban long Myntri.
