Ha ka sien kaba nyngkong eh ba ngi iohi ha ki kam politik ha State jong ngi ba ki political party kin ia tyngkhuh bad ki bor pyniaid shnong,ki bor Raid, ki bor Hima khamtam ha ka por Election. Ki bor pyniaid shnong ruh ki don la ka bor synshar laitluid (Autonomous Body), kumba long ka District Council khamtam haba la wanrah ka Parliament ia ka Amendment halor ki Panchayati Raj System.
Kane ka Election MDC mynta u snem 2025 ka la ia tyngkhuh bad jia ryngkhat (co-incidence) hapdeng ka Final Exam ba la pyniaid da ka MBOSE ha ki kyrdan SSLC bad HSSLC. Don ruh ki khynnah kiba la kham heh ka rta, ki la ioh ruh ban don bynta ha ka jingthep vote wat hapdeng ka Exam jong ki ruh.
Don ruh kiba pynleit jingmut shisha triang ha ka jingpule jong ki khnang ba kin poi kham shakhmat. Ki paidbah bad ki kmie ki kpa ki khmih lynti ba ka sorkar, ki political party, ki shnong ki thaw, ka Society baroh kawei kin pyrkhat kyrpang ban iarap lem, ban ai mynsiem lem bad ban wad ki lad ki lynti kumno ban kham lah shuh shuh ban kyntiew ia ka jingpass bha ki khynnah khamtam haba ngi iohi ia ka jinghiar arsut ka pule puthi ha ka jylla jong ngi nalor ka jinghiar ka percentage jong ka jingpass ki khynnah ha ki Public/External Exam ba la pyniaid (conducted) da ka ka MBOSE man la u snem.
Kaba phylla pat, phewse, ka long ba, ka party kiba ki paidbah ki khmih lynti ba ka dei ka party kaba don bun eh ki Nonghikai ba stad bad ba kham shemphang, ka party kaba don bun ki Asst. Lecturer, ki Professor, ki Faculties, etc kiba dei ruh ki nongsaindur ia ka lawei jong ka pule puthi jong ki khynnah, kiba ngi khmih lynti ba kin long kiba pyrkhat lem ia ka bit ka biang bad jingmyntoi ki khynnah, kin pyrkhat bad leh politic pynban ia ka lawei ki khynnah tang na ka bynta ka jingiohnong potitic jong ki. Imat, tang ban jop Election, lada pheil (failed) lut ki khynnah ruh ym lei lei.
Ngi iohi ruh, ba ki don ki shnong kiba kwah pynlong Common Platform ioh ka ktah bad ktha jabieng ki khynnah ha kum kane ka por Exam namar ka dei ka por (critical time) ban rai ia ka pass ka pheil (failed) jong ki. Ngi iohi ruh ba don pat ki shnong kiba rai ban pyrshah ban leit thep vote kaba long pyshah ia ka hok thep vote (voting right) jong ki paidbah. Kaba kham ithamula shuh shuh ka long ba don ki kynhun shnong bapher bapher kiba la ia rai bad pynpaw shai kdar ban kyrshan tylli tylla tang sha uwei u candidate jong ka Party uba ki kwah ban pynjop ia u.
Kane lei lei ka la pynkhein lypa pyllein pyllein ia ka hok thep vote jong ki paidbah ne secret ballot(secret voting). Lada ki political Party ki byrngem ban ai mukotduma, ki dei ban ai lang solonsar khlem leh shiliang ia kino kino ki Dorbar shnong. Lada leh tang ia kawei kata kam itynnad satia.
Lada ki political party ki la iatyngkhuh lypa bad ki bor pyniaid shnong ha shwa ban long Election ynda la jop lei, la i shemtieng ioh ki nang lehbein, niewbein, kin leh bym salia bad leh khla katba mon (dominate) ia ki bor pyniaid shnong (traditional institutions). Lada ka long ha kata ka rukom, ki ban iap (victims) dei ki paidbah namar, ka ktien ka maham ba lada ia khun ki hati nang iap pynban u phlang.
