Shillong, K’ Lyngkot 30: Ka Khasi Students’ Union lyngba ka Employment Monitoring Cell ka pynrem jur ïa ka jingthung kam sop sop hapoh Khasi Hills Autonomous District Council (KHADC).
Katkum ka jinglum khubor na liang ka Seng, la ïoh jingtip ba la thungkam ïa bun ngut ki briew hapoh KHADC khlem kano kano ka jingpynlait ïa ki advertisement ne jingpynbna thungkam ha kine ki khyndiat sngi bad taïew ba ladep. Kane ka long khongpong ïa kaei kaba ka Seng ka ïohi ha ki tyllong khubor ha 10 tarik u Kyllalyngkot, 2025 ba na ka liang ka District Council kan pynthymmai ïa ka Service Rules 1961 bad ban wanrah ïa ki recruitment policy kiba shai khnang ba ka thungkam thungjam hapoh ka District Council kan long kaba khuid.
Kane kam dei shuh ka sien kaba nyngkong ba ha District Council la thungkam thungjam tuh khlem pynlait advertisement ne pynlong ïa kino kino ki kynja eksamin ban jied ïa ki samla wad kam hynrei kane ka ju ïai jia man ka por bad ïa kane la paw ruh ha ka CAG Report halor ka jingthung kam tuh naduh u snem 2017 ter ter haduh mynta.
“Ka Seng mynta ka sngi 30 tarik u Kyllalyngkot, 2025 ka la leit kynduh ïa u Bah D. G. Syiemïong, Secretary ka Khasi Hills Autonomous District Council (KHADC) ban jurip kham bniah halor kane ka bynta. Na ka liang u Secretary um shim la lah ban pynshai halor ka jingthung kam thymmai hapoh District Council hynrei la batai ba ka shong ha ka rai jong ka Executive Committee jong ka District Council bad na ka liang jong ka office ka pynïaid katkum ka jingbthah,” ong u Samla Reuben Najiar Asst. General Secretary cum Chairman, Employment Monitoring Cell Khasi Students’ Union ha ka kyrwoh khubor.
Ka Seng ka la pynpaw ba ka kwah ban maham jur ba ka District Council kam dei ka nongkynti jong ki nongmihkhmat ne ki MDC ba kin thungkam ïa kat kiba ki sngewbit sngewbiang khlem don ki eksamin thungkam kaba khuid kaba suba.
“Ka Seng kan sa buh ïa ka dorkhas hakhmat u CEM ka KHADC ha kine ki sngi bad ha kajuh ka por ka dawa ba dei ban pynsangeh shisyndon ïa ki appointment thymmai ba dang shu dep ha kine ki sngi ïa bun ngut ki briew khlem kano kano ka recruitment kaba biang lem kumta ka Seng kan hap ban shim da kiwei ki sienjam,” ong u Samla Reuben Najiar Asst. General Secretary cum Chairman, Employment Monitoring Cell Khasi Students’ Union.
