Shillong, Nailar, 28: U Myntri Rangbah barim ka Jylla u Dr. Mukul Sangma uba long ruh u Parliamentary Party Leader jong ka Trimanool Congress (TMC) ha ka sngi Balang u la phah da ka jingthoh sha u Lamphang jong ka Iingdorbar Thawaiñ ka Jylla ban kam ïa ka shuki Nongïalam ka Liang Pyrshah hapoh ka Ingdorbar Thawaiñ ka Jylla.
Kane ka la wan hadien shisien ba u MLA ba marwei ka Congress u Bah Ronnie V. Lyngdoh u la iehnoh ïa ka kam kum u Nongïalam ka Liang Pyrshah bad ai jingkyrshan ïa ka TMC na ka bynta kane ka shuki.
Ha ka jingïakren bad ki lad pathai khubor u Lamphang jong ka Ingdorbar Thawaiñ u Thomas A. Sangma u la pynthikna ba ula ïoh pdiang ïa ka shithi na u Bah Ronnie uba la iehnoh ïa ka kam kum u Nongïalam ka Liang Pyrshah.
“Nga la ïoh pdiang ïa ka shithi na u Bah Ronnie uba la iehnoh ïa ka kam Nongïalam ka Liang Pyrshah bad ha kajuh ka por u la phah ruh ïa ka shithi ba u la ai jingkyrshan ïa ka TMC. Namarkata, u Dr. Mukul Sangma kum u nongïalam ka TMC u la kam ïa ka shuki Nongïalam ka Liang Pyrshah,” la ong u Lamphang.
U Lamphang u la ïathuh, da ka jingai jingkyrshan jong ka Congress, ka TMC ka la kiew sha ka jingbunpaid kaba hynriew ngut.
“Mynta ka sngi, nga la ïoh pdiang ïa ka shithi ai jingkyrshan na u MLA ba marwei ka Congress bad na ki san ngut ki MLA ka TMC. Ka jingbunpaid jong ki ka la kiew sha ka hynriew ngut, kaba long thik 10 percent bad ïa kaba mynta nga dang bishar,” la ïathuh u Lamphang.
Ha kaba ïadei bad kane, ka TMC ka la ai jingkyrshan ïa u MLA ka Congress u Bah Ronnie V. Lyngdoh ba un long u Chief Whip jong ka Liang Pyrshah.
U Lamphang u la ïathuh ba dang bishar bniah ïa kane ka jingkam trai jong ka TMC bad shen un sa pynmih ïa ka rai.
Shwa kane, u Dr. Mukul Sangma ba la synran lang da ki MLA ba la ai jingkyrshan ki la leit ban ïakynduh ïa u Lamphang ha kamra treikam jong u.
“Nga la sakhi hi dalade ïa ka jingpynshisha jong ki,” la pynthikna u Lamphang.
