Shillong, Nailur, 26: Ki nongïalam ka Federation of Khasi Jaiñtia and Garo People (FKJGP) Khliehriat Circle bad ka Meghalaya Peoples United Front (MPUF) Khliehriat Circle ba la lamkhmat da u Secretary u Bah Justme Sana bad u President u Bah Kyrshan Blah ki la pynkynmaw biang ïa u Superintendent of Police jong ka East Jaiñtia Hills ha kaba ïadei bad ka dorkhas ba ki ar seng ki la buh ha ka 21 tarik, Jymmang, 2025 halor ka jingdon ki nongkhaii tuh ïa ki masi bad ïa ka shini sha ka ri Bangladesh.
Ha u kyrwoh ba la phah sha ki lad pathai khubor, ki ar seng ki la ong, “ngi sngew phylla ban tip ba wat hadien ba ladep ujor sha u Superintendent of Police hynrei ki kam shalan beaiñ ïa ki masi khlem ki kot ki sla kiba biang ki dang ïai bteng haduh mynta mynne.”
“Kaba sngew phylla shuh shuh ba ki kam beaiñ ki ïaid lyngba ki Check Point jong ki Pulit ka Ladrymbai hynrei ym don ba khanglad ïa ki bad kane ka pynsuba ïa ki nongujor ba ka lah ban don kaei kaei shalyndet da ka jingïasngewthuh jingmut,” la kynnoh ki ar seng.
“Ka jingshalan tuh ïa ki masi sha ka ri Bangladesh lyngba ka thaiñ Ladrymbai ym tang ba ki nongkhaii beaiñ ki la pynrung tuh ïa ki masi sha ka ri Bangladesh hynrei ki dei ruh kum ki nongïalam bad ki nongpyni lynti ïa ki nong Bangladesh kumno ban ïoh rung tuh shapoh u pud u sam ka ri India jong ngi bad ka jing bym shimkhia da ki bor ba dei peit ka lah ban buh jingma bha ïa ka jylla jong ngi khamtam ha East Jaiñtia Hills bad la ïohi ba ki jait Muslim ki kynrei bha ha ki thaiñ Ladrymbai, Khliehriat bad kiwei ki jaka hapoh ka East Jaiñtia Hills,” la kynnoh ki ar seng.
