Shillong, ïaïong, 14: Ka jinghiar pateng ki Syiem ki Patsha ha ka ri India ka la kut noh hadien ba ka ri ka la ïoh ïa ka jinglaitluid ha u snem 1947. Hynrei ki nonghiar pateng na kum kine ki iing syiem ba khrawbor ki dang ïai im haduh kine ki sngi hapoh ka dewbah jong ka ri India, kiba la mih shakhmat ban kam nongkynti ïa ki jingteinam kiba rim bad ïa ki jingdon jingem. Uwei na kine u dei u Khun syiem Yakub Habeebuddin Tucy, uba la kam ba u dei u nonghiar pateng na u patsha Bahadur Shah Zafar, uba long u patsha Mughal uba khatduh eh ban synshar ha ka ri India.
U Khun syiem Tucy, uba shong basah ha Hyderabad, u la paw bha ha kine ki sngi ha ki lad pathai khubor namar ka jingmih jong u shakhmat ban kam trai ïa ki katto katne ki jingtei nam kiba rim ba la tei ha ka juk ki mynnor ba ki syiem Mughal ki dang synshar ïa ka ri India. U Khun Syiem Tucy u la ïaiban ba u don ïa ka hok longtrai ïa ka Taj Mahal, kawei na ki jingtei bapawnam tam ha ri India ba la tei da u Patsha Shah Jahan na ka bynta ka tnga baieid eh jong u, ka Mumtaz Mahal. Ha ka jingpyrshang ban pynshisha ïa ka jingkam nongkynti jong u, u la aiti ruh ïa ka kaiphod DNA sha ka iingbishar Hyderabad.
Nalor ka Taj Mahal, u khun syiem Tucy u la don bynta ruh ban kam trai wat ïa ka jaka ba la tei ïa ka Ayodhya Ram Mandir. U la kam ba lada kane ka jaka kan dei ka nongkynti ba shisha jong u Patsha Mughal u Babur, namarkata, ma u bad ka ing ka sem jong u kin dei ki nongïoh kynti ba dei hok ïa kane ka jaka. Hynrei kham hadien u la pynpaw ba u la noh synniang mon sngewbha ïa kane ka jaka na ka bynta ban tei ïa ka Temple bad noh synniang ruh ïa ki mawit ksiar na ka bynta kane ka projek.
Ha lyndet kine ki jingkam nongkynti, u khun syiem Tucy u la long ruh u nongsumar ïa ka jingtep jong u Patsha Aurangzeb ha ka jyllal Maharashtra bad u la pan jingkyrshan ruh ban ïada ïa kane ka jaka da kaba kyntu ïa ka Sorkar ba kan ïada na kino kino ki jingshah leh dusmon.
