Shillong, Lber, 24: Ka shnong Khanduli kaba hap hapoh West Jaiñtia Hills District ka long kawei na ki shnong kiba dang don mynta ha ka jingïakajia khappud bad ka Jylla Assam haduh mynta mynne bad ki nongshong shnong jong ka shnong Khanduli ki ju ïakynduh ïa ki jingshah pyndik na ka por sha ka por ha ki jaidbynriew Karbi na ki shnong kiba marjan.
Ha ka sngi Saitjaiñ jong ka taïew baladep ki nongtrei na ka tnat Forest jong ka jylla Assam ryngkat bad ki shi kynhun ki nongshong shnong Karbi kiba la rah ïa ki wait bad ki dieng ki la hiar sha ka Khlaw Pdienlangho jong ka shnong Khanduli da ka jingthmu ban pynthut ïa ka jingpom dieng thang jong ki nongshong shnong ka Khanduli namar ki Karbi ki kam ba kane ka khlaw ka dei kaba dang hap hapoh shnong Karbi kaba la ki la jer tip kyrteng da ka Tadonglangso.
Tang shu poi ha kane ka khlaw, ki nongtrei jong ka tnat Forest ki la bat ïa kawei ka kali Bolero pickup kaba la niah hi da u trai kali uba la tip kyrteng kum u Bah Hom Muruh hynrei ynda u Bah Hom u la ïohi ïa ki nongtrei jong ka tnat Forest bad ki Karbi ula ieh ïa ka kali bad phet krad ïalade da kaba rah lang ïa u shabi kali. Kumta ïa kane ka kali la tan noh da ki nongtrei jong ka tnad Forest da ka jingthmu ban leit rah ïa ka Hamren, West Karbi Anglong District.
Halor kane ka jingjia, u bah Hom ula pyntip marmar ïa ki bahaiing hasem jong u bad ula bthah ïa ki ban leit da kawei pat ka kali Bolero kaba don ïa u number ML04C 3505 sha ka shnong Tadonglangso lyngba ka surok kaba poi sha IB Assam hajan ka shnong Khanduli.
Katto katne ngut ki bahaiing hasem kiba la leit sha kane ka jaka kumba la bthah da u Bah Hom, hynrei ynda kil a poi hajan kane ka jaka katto katne ngut ki Karbi ki la lynthem da ki maw ïa ka kali bad ka iit kali kaba nakhmat ka la julor, bad da ka jingbym banse ki bahaiing ki la hap ban phet noh na kane ka jaka hynrei u nongniah jong ka kali ïa uba la tip kyrteng kum u Bah Solomon Laloo ula ngat ha ka kti jong ki nongtrei ka tnat Forest bad ula shah rah lang bad ka kali sha Hamren.
Tang shu ïoh jingtip ïa kane ka jingjia marmar ki bor synshar jong ka West Jaiñtia Hills District ki la phah ïa u Executive Magistrate u Bah GH. Passah bad ïa ki Pulit sha ka shnong Khanduli khnang ban tehlakam bad ban pyllait ïa kine ki ar tylli ki kali ba la shah tan.
Ki nongshong jong ka shnong Khanduli ki la ïamih paidbah ha ka janmiet 22 tarik, Lber 2025 da ka jingap khmih lynti ba kine ki ar tylli ki kali kin poi noh ha ka shnong Khanduli hadien ba ki la bna khubor ba yn pyllait noh hadien ka jingshim khia jong ki bor synshar district hynrei ka jingap khmih lynti kam shym la urlong satia namar la lah ban pyllait ïa ka kali bad u Bah Solomon tad haduh ka 23 tarik, Lber, 2025 katba ïa kawei pat ka kali Bolero pickup jong u Bah Hom la pyntip ba yn sa pyllait hapoh khyndiat sngi.
