Shillong, Lber, 20: Ka Dorbar Shnong Lumkseh kaba long ruh ka dkhot jong ka Synjuk Dorbar Pyllun Hynriew Shnong, Ribhoi bad East Khasi Hills ha ka sngi Palei ka la mudui sha ki Pulit ka Mawdiangdiang Police Outpost ban pynshitom katkum ka aiñ ïa ki san phew ngut ki bar jylla kiba kam ïalade kum ki trai shnong jong ka shnong Lumkseh, East Khasi Hills District ban ïoh Aadhaar Card da kaba pyndonkam da ki dulir kiba thok.
Katkum ka jingujor, nalor ki 50 ngut ki bar jylla, san ngut kiba la paw kyrteng ki long u Pappu Kumar Rajbhar, Arun Rajbhar, Dayanand Rajbhar, u Nitish Yadav bad Deepak Yadav.
U Rangbah Shnong jong ka shnong Lumkseh Bah Kenes Khonglam haba ïakren bad u nongthoh khubor hadien ba ladep ujor sha ki Pulit, u la ong ba ka shnong kam don jingtip eiei halor ka jingkam trai shnong jong kine ki bar jylla namarba kam shym la ai satia ïa kano kano ka jingthoh kaba pynshisha ïa kine ki bar jylla kum ki trai shnong ka shnong Lumkseh.
“Ka jingkam jong kine ki briew kum ki kum ki nongshong shnong ka Lumkseh ka dei kaba shu thok bad lamler. Sngewbha ban leh da kaba tyngeh katkum ka aiñ pyrshah ïa kine ki briew,” la kyrpad u Rangbah Shnong ïa ki Pulit.
“Kine ki briew ba la kdew haneng kim dei satia ki nongshong shnong jong ka shnong Lumkseh bad namarkata nga kyrpad ïa phi ban pyndam mardor ïa ka jingpynshisha (verification) namarba ki la aiti da ki dulir kiba shu thok sha ki bor ba dei peit,” la pynpaw u Rangbah Shnong Lumkseh.
“Shuh shuh, kum ban shu pyntip ba ka shnong Lumkseh ka dei la ka jong ka shnong kaba hap hapoh ka East Khasi Hills. Kam hap satia hapoh u pud u sam jong ka shnong Tynring. Kino kino ki dulir ne ki jingpyntip ba la ai da u Secretary jong ka Shnat Raid Tynring, Khyrim Syiemship, sha ki briew ba la kdew kyrteng haneng ha ka kyrteng jong ka Dorbar Shnong Lumkseh dei ban ñiew kaba long bein bad ki dulir kiba shu thok,” la ong shuh shuh u Rangbah Shnong Lumkseh.
Katkum ka jingïathuh jong u Bah Kenes Khonglam, ki don haduh 51 ngut ki bar jylla kiba ka Aadhaar Card ka la poi lyngba ka Post Office sha ka shnong bad ïa mynta ka shnong.
“Ngi kyrpad ïa ki bor jong ka aiñ ba kin leh da kaba tyngeh ban thwet ïa kine ki briew namarba ka dei ka jingleh thok leh burieh kaba pynbudnam ïa ka shnong,” la ong shuh shuh u Rangbah Shnong.
