Shillong, Naitung, 12: U MDC shu sieh jong ka Khasi Hills Autonomous District Council (KHADC) Bah Bindo M. Lanong uba la long teng u Symbud Myntri Rangbah ka Jylla ha ka sngi Thohdieng u la ong ba um dei shuh u dkhot jong ka United Democratic Party (UDP) namarba ki nongïalam ka party kim shym la shah khot satia ïa u sha ka General Council kaba la long ha u snem ba ladep.
Katkum ka jingpynpaw jong u, um pat shim rai satia la un leit ïasoh neem sha kiwei ki party.
Ha ka jingïakren bad ki lad pathai khubor, Bah Lanong u la ong, “ngam sngew eiei lada phim ai tiket ïa nga na ka bynta ka MLA bad ka MP elekshon hynrei nga dang don ka jingkhmih lynti ïa ki ban khot ïa nga sha ka general council (namarba ki la pynpaw ha ki lad pathai khubor ba nga dang dei hi u dkhot ka UDP).
“Nga dang pyrkhat ba lada kin khot ïa nga sha ka general council, ngan leit ïashim bynta. Nga dang pyrkhat ba ngan dei uba nyngkong eh ban ïakren pynbeit badno kano hynrei ngam shym la shah khot. Haba phim shah khot sha ka general council kata ka mut ba phim dei shuh u dkhot jong ka party,” u la ong bad bynrap, “namarba ngam shym la shah khot, ngam dei shuh u dkhot jong ka UDP. Ngam dei ma ngam uba phet hynrei ka party hi ka la leh kiar ïa nga.”
U Bah Bindo u la ïathuh ba dei na kine ki daw, mynta u long kum kum u MDC shimet ba shu shusieh uba la shim hi dalade ïa ka rai ban kyrshan ïa ka nabar ïa ka Executive Committee jong ka NPP ba la ïalam da u Bah Pynïaid Sing Syiem.
“Nga la leit pyntip sha u Bah Titos shaphang ka rai jong nga namarba baroh shikatta nga shong lang bad ka UDP hangne watla kim shym la khot ïa nga sha ka general council bad ba ngam dei shuh u dkhot ka UDP hynrei nga dang don lang ha ka UDP ba la ïalam da u Bah Titos. Nga la pyntip ïa u ba ngan ai jingkyrshan na shabar ïa ka EC jong u Bah Pynïaid. Haba u kylli, nga la jubab ba phim shym la khot ïa nga sha ka general council namarkata ngam dei shuh u dkhot jong ka UDP. Nga la pyntip ba u kyrtong MLA jong phi na Nongkrem u Lambor Malngiang ruh u la ai jingkyrshan ïa ka EC ar taiew shwa ïa nga bad ki ong ba kin sa leh eiei pyrshah ïa u,” u la ong.
Haba pynksan ïa ka rai lajong ban ïakhun pyrshah ïa u kyrtong ka UDP na Nongkrem ha ka elekshon MLA 2023, u Bah Bindo u la ong, “ngam khmihlynti ba kin ai tiket ïa uba nabar. Na kata ka daw nga la rrai ban ïaid beit shakhmat da ka jingthmu lada ki ai tiket ïa nga uba na iing, ka biang namarba nga la ïaid shakhmat ban trei lane lada ki ai ïano ïano na kajuh ka iing, ngan hap ban shiong hynrei ki ai pynban shawei, uba dei nabar ka iing, kumno ngan rai ban shong noh. Halor kata, nga la rai ban ïakhun beit (ïa ka elekhson na Nongkrem constituency).”
“Hadien ba nga la ïohi ïa ka jingkren jong u Bah Metbah ba dang don bynta hapoh ka UDP), ha u Lber, 2023 hadien ka elekshon, nga la rai ban aplai tiket na ka bynta ka elekshon MP, kum u briew uba la tur lut sha baroh ki distrik bad sha ki nongkyndong jong ka rilum Khasi-Jaiñtia kynthup ruh ïa ki Hima, nga la long u MLA ar sien kynthih, nga la long MDC 7 sien, bad kum u Symbud Myntri Rangbah ka Jylla, kaba mut ka lynti ka dei kaba la jrong bha bad nga da tip bha ruh shaphang ki dorbar shnong,” u la ong bad bynrap, “nga la pyrkhat ngan klet noh ïa kaba ladep bad nga la rai ban aplai tiket ha u Lber (da kaba pyrkhat ba ngin ïa klet noh ïa kaei kaba la jia ha Nongkrem). Nga la lah ba ïakhun ïa ka elekshon Lok Sabha bad nga la aplai tiket. Nga la thoh sha u President bad sha u General Secretary jong ka party hynrei ngam shym la ïoh jubah. Nga la phah ïa ka jingthoh pynkynmaw ha u bnai Jymmang ban kyrpad ba kin shim rai halor kane kam. Ka elekshon MP ka dei kaba heh bad kaba kynthup haduh 36 Constituency. Nga la kyrpad ïa ka party ban ai por ïa nga ar taiew ban khot ïa ki nongkyrshan hynrei kim shym la ai jubab satia ïa nga.”
Shuh shuh u la ïathuh namarba ka por ka la thmit palat, u la rai ban weng noh ïa ka jingpan tiket MP.
“Wat lada ki rai ban ai tiket ïa nga ruh ngan kyntait namarba ka por kam don shuh ban pynkhreh ïa ka elekshon,” u la ong.
U Bah Bindo u la kynnoh ba ka UDP ka la shet kylla ruh ïa u kyrtong MP u Bah Robertjune Kharjahrin.
“Nga sngewsynei ïa u Bah Robertjune Kharjahrin. Ha kane ka juk, phim lah shuh ban ïanujor bad ki juk barim, ngi im ha ka juk thymmai, phi donkam ban long u MLA ne u MDC. Nga tip bha ba u Bah Robertjune u la shah shet kylla. Hadien ba la pynbna ïa ka result elekshon, ka UDP ka ïoh tang 40, 000 hajar na kaba ju ïoh 1.50 lak vote ha ki snem baladep,” u la ong
“Kane ka pynpaw ïa ka jinglong ki nongïalam ba mynta,” la kynthoh u Bah Bindo.
