Shillong, Nailar 24: U MDC ka BJP na Tura u Bernard N Marak u la kyrpad ïa u Myntri Rangbah ka jylla u Conrad K Sangma ban khot ka jingïalang kaba kyrkieh ban ïakren halor ka jingkynnoh ba pyndonkam bakla ïa ki pisa na ka bynta ki kam pynroi ba la thmu ban ai sha ki paidbah, ha kaba kane kadei ka jingpynkheiñ ïa ka Garo Accord.
“La kyrpad ïaphi ban khot ka jingïalang kaba kyrkieh khnang ba ngin lah ban pynpaw ïa ki jingdkoh ki kam ha ka Council bad khnang ban lah shim ki kam pyrshah ïa ki contractor kiba la wanrah ka kyrteng kaba sniew ïa ka GHADC bad ka jingpynkheiñ kaba khraw bha ïa ka Para 7.6 jong ka jingïamynjur ne Accord,” ong u Marak ha ka shithi ba la phah sha u Sangma ha ka sngi U Blei.
U Marak u la kynnoh ba la don ka jingduna haba ïadei bad ka jingai jingkheiñ kaba khuid bad ka jingleh audit kaba dei bad ki fund ba la mang da ka sorkar pdeng, ba kynthup ïa ka song jingïarap pisa kaba kyrpang (special package) kaba dei T. 100.71 klur kaba la mang ha ka snem 2014.
U la kynnoh ruh ba ki contractor kiba don ka jingïadei bad ka party jong u Myntri Rangbah ki la ïoh ki jingmyntoi na kine ki fund, ha kaba katto katne ki project ki dei ki duplicate ne ba la pyndonkam bakla.
Haba phai sha ka jingïamynjur ne ka Accord, u Marak u la ong, “Ka Para 7.6 ka kren shai ba ka donkam ka jingbat pyrkhing ïa ki kyndon ba la thaw haba ïadei bad ka jingpynïaid ïa ka kam pisa pilaiñ haba ïadei bad ki jingtreikam ha ka Council bad ïa baroh ki jingsngewkhia dei ban pynneh ha ka kyrdan kaba halor khnang ban lah ban ïada ïa ka jingpyndonkam bakla ïa ki pisa kiba dei ki kam pynroi na ka bynta ki paidbah. Kadei ban don ka rukom treikam kaba biang haba ïadei bad ki jingai jingkheiñ ïa ki projek kam pynroi kiba la pyntreikam da ki shnat kum ka NABARD bad kiwei kiwei. Kum kine ki kaiphod ai jingkheiñ ha ryngkat bad ka Action Taken Report (ATR) na ka Council dei ban leit ai sha u Lat ka jylla bad ka Legislature katkum ka por ba la buh.”
Shuh shuh u la ong ba ka jingeh kaba mih mynta hapoh ka Council ka dei na ka daw ka jingbym don ka jingai jingkheiñ kaba biang ïa ki fund ba la mang da ka sorkar pdeng kum shi bynta ban wanrah ki kam pynroi ïa ki paid Garo, kaba la sdang na ka song jingïarap kaba kyrpang kaba dei T. 100.71 klur kaba la mang hadien ba la soi ïa ka jingïamynjur (Accord) ha u snem 2014.
“Bun na kine ki contractor ki dei na ka party jong phi bad katto katne na kine ki project ki dei kiba la bujli ne duplicate da ka State Project kaba la ai kyrteng da ka Tribals Research Centre ba la mang lyngba ka Ministry of Tribal Affairs kaba la tei halor ka Museum ka Council hapoh ka jaka jong ka Council kaba ha ka shnong Chidekgre,” ong u Marak da kaba kam ba kine ki dei tang ki jingpyntip kiba khyndiat halor ka jingpyndonkam kaba bun bha ïa ki pisa ba la mang da ka sorkar pdeng kaba la thmu na ka bynta ki paidbah ka Garo Hills.
