Shillong, Rymphang, 14: Ki shipai Border Security Force (BSF) Meghalaya ha ka sngi Palei ki la ïohbat ïa bun ngut ki mynder Bangladeshi kiba thmu ban jam da ka lynti kaba beaiñ na ri India sha ka ri Bangladesh lyngba ka jylla Meghalaya.
Hadien ba la ïoh jingtip na ki tnat syntiat, ki shipai BSF kiba la pynlong ka jingap ktem ki la ïoh pynsangeh ïa ki phra ngut ki mynder Bangladeshi bad uwei u nong India uba dei u nongñiah kali kiba shong ha ka kali Innova kiba dang thmu ban leit sha Tura lyngba ka surok NH-217. Ïa kine ki phra ngut la bat hajan ka khappud katba ki dang thmu ban leit phai sha ka ri Bangladesh na ri India.
Ha kawei pat ka jingpynap shrip ki shipai BSF Meghalaya ki la ïoh bat sa hynriew ngut ki mynder Bangladeshi ryngkat bad arngut ki nong India hajan khapppud. Kine ki jingpynap ktem da ki shipai BSF Meghalaya ka long ban tehlakam ïa ka jingrung beaiñ ha khappud bad ïa kiwei kiwei ki kam runar ruser.
Hapdeng kine ki jingkhynra, ki shipai BSF na Tura bad ki shipai BSF jong ka 4th Battalion kiba la i suba ïa ka leit ka wan ha khappud mar mar ki la ap ktem bad kam bat haduh 14 ngut ki mynder Bangladeshi bad lai ngut ki nong India.
Ïa baroh kiba la shah bat la aiti noh sha ki Pulit ban leh katkum ki kyndon jong ka aiñ
Ha ka jingtohkit, ki mynder Bangladeshi ki la phla ba ki leit trei kum ki nongsuh jaiñ bad kum ki nongbylla sngi ha kawei ka kompeni suhjaiñ ha Tiruppur, Tamil Nadu bad ki la rung beaiñ sha ri India dang khyndiat bnai mynshwa. Ka jingpyrshang jong ki ban leit phai biang sha Bangladesh da ka lynti kaba long be-aiñ ka la shah pynpulom noh da ka jingpeitngor jong ki shipai BSF.
