Shillong, ïaïong, 01: Ka kynhun ki Pulit ka Special Cell, East Khasi Hills ki la ïohkem ïa ki lai ngut ki snar nongtuh thuk thuk na 101 Area ha ka step synnia sngi Baar ïa kiba la tip kyrteng kum u Timus Warbah (30 snem), u Babar Mawblei (26 snem) bad u Synraplang Makri (23 snem), kiba dei ki nongshong shnong jong ka shnong Jirang, Ribhoi District.
U Kyrwoh ba la phah da u Superintendent of Police ka East Khasi Hills Bah Vivek Syiem u la pyntip ba ïa ka kali Alto ba la pyndonkam da kine ki snar nongtuh ban swait shang tuh ïa ki thuk thuk ba la pynieng harud surok kylleng ka sor, la ïoh kurup da ki Pulit.
Ki Pulit ki la ïoh kurup ruh na kine ki snar nongtuh ïa ka thuk thuk KTM ba la shah tuh ha ka step phyrngab jong ka Lah sngi u Blei na Malki.
Ki arngut ki briew kiba la tip kyrteng kum u Meaibor Kharryjja, 26 snem na Sohlap, Shella bad u Bakordor Rapmai 24 snem ka rta na Jatap, Shella kiba ïarap ban pynpoi ïa ki thuk thuk ba la shah tuh sha ki nongkhaii tuh jong ka ri Bangladesh ki la shah kem lang ha ki Pulit.
U SP u la pyntip ba kane ka kynhun ki snar nongtuh ka dei kaba ju donkti ban rong tuh ïa kiba bun ki thuk thuk ar shaka ha kylleng ka nongbah Shillong.
Kine ki snar nongtuh ki dang don mynta ha ka ruhnar jong ki Pulit.
