Shillong, Jylliew 10: U Myntri ka Sorkar Jylla Bah Paul Lyngdoh uba long ruh u nongaiktien jong ka Sorkar ha ka sngi Baar u la ong ba ka Meghalaya ka donkam ban pynkhlaiñ ïa ki aiñ kiba la don lypa katba dang ap ïa ka jingmynjur jong ka Sorkar Pdeng ban pyntreikam ïa ka Inner Line Permit (ILP) kaba dang lah ban shim por.
Ha ka jingïakren bad ki lad pathai khubor u Bah Paul u la ong ba ka ILP ka dang dei ka jingdawa kaba dang ïaid shakhmat bad ka dei ruh ka mat kaba heh ïa kaba la mynjur ruh da ka Iingdorbar Thawaiñ ka jylla.
“Ka dang dei ka jingdawa kaba dang bteng hynrei ha kane ka kynti ngi dei ruh ban pynkhlaiñ ïa ki aiñ kiba la don lypa namar ban ap ïa ka jingmynjur jong ka Sorkar Pdeng halor ka ILP lehse ka lah ban kham shim por. Ha ka jingshisha ka la shim por shikatdei eh,” u la ong.
Da kaba pynpaw ba ka Sorkar kan pynthymmai shuh shuh ïa ka Standard Operating Procedures (SOP) na ka bynta ka jingshngaiñ bad ka jingïada ïa ki nongshong shnong bad ki nongjngohkai pyrthei kiba wan sha ka jylla, u Bah Paul uba peit ruh ïa ka tnat Jngohkai Pyrthei u la ong, “kumjuh ruh, ngi don ïa ka Meghalaya Residents, Safety and Security Act (MRSSA), ngi donkam ban pynkhlaiñ ïa ka.”
Ka jingdawa ïa ka ILP ka la nang kham sawa ha ka jylla hadien ka jingshah pynïap jong u Raja Raghuvanshi u nongjngohkai pyrthei na Indore, Madhya Pradesh ha ka shnong Sohra.
Ki sengbhalang kiba dawa ïa ka ILP ki la ong kane ka aiñ ka long kum ka jingkhang kaba ïada ïa ki briew ba nabar kiba wan shapoh ka jylla da ka jingthmu ban leh ïa ki kam runar ruser.
 | ReplyForwardAdd reaction |
