Shillong, Nailar, 23: Ki shipai BSF kiba ap pahara ha BOP Nayabazar, East Khasi Hills ki la ujor sha ki Pulit ba ha ka 20 tarik mynta u bnai hadien ba la ïoh jingtip na ki tnat syntiat, ki la ïohi ïa ki briew ba i suba ka ïaid ka ieng ba la suba ba ki dei ki snar nongkhaiï tuh kiba dei ki mynder Bangladeshi kiba don kumba 9-10 ngut hajan ka khappud bym pat ker saiñar hajan u mawpud Border Pillar No. 1262/5-S.
Ki shipai BSF ki la shah kawang maw pynban ynda ki beh ïa ki suba mynder Bangladeshi. Da kaba pynphai kylla, ki shipai BSF ki la kawang da uwei u stun grenade bad ki snar nongkhaiï tuh ki la phet krad lailum laiwah sha Bangladesh.
Ha ka jingkhynra, ki shipai BSF ki la ïoh kurup ar tylli ki masi na ka jaka don ki mynder ri.
U Bah Ringkupar Mitri u la ujor da ka ejahar sha ki Pulit ban pyntip ba ha ka 16 tarik, Nailar ki runar ki bym lah ban ithuh ki la rong tuh ïa ka thuk thuk motorcycle kaba don ïa u nombar ML-05U-4502 na Police Bazar, Shillong.
U Manoy Kumar Roy u la ujor sha ki Pulit pyntip ba ha ka 18 tarik, Nailar, ki
runar ki bym lah ba ithuh ki la tuh ïa ka Scooter jong u na 4th Furlong, Polo,
Shillong.
Uwei u nongshong shnong ha kawei ka shnong ha nongbah Shillong u la ujor ba ha ka 12 tarik, Ïaiong, 2025, kawei ka briew ba la tip kyrteng kum ka Pravita Bordoloi na Kamrup, Nagaon-A, Assam ka la shukor ïa u da kaba die ïa ka kali kaba dang hap ban siew dep ïa ka ram bad kam shym la ïathuh satia ïa u ha ka por ba la die ïa ka kali.
Uwei u rangbah briew na ka shnong kaba hap ha Eastern West Khasi Hills u la ujor ba ha ka 15 tarik, Nailar u ïoh missed call na uwei u number bym lah ban ithuh. Hynrei ha ka 18 tarik, Nailar u la shem ba ka pisa T. 1.17 lak ka la shah ot na ka Bank Account jong u lyngba ka jingshah sei pisa bym lah ban ithuh.
U Singding Ch Marak u la ujor ba ha ka 19 tarik, Nailar ha ka por kumba 11:00 baje mynstep uwei u runar bym lah ban ithuh u la pyrshang ban tuh jubor na pla ïa ka pisa T 2,200 ha iew Songsak. Ki paidbah kiba la ïohbat ïa u ki la shoh pynmynsaw ruh ïa u. Ki Pulit ki la kem noh ïa uwei uba la shah kynnoh ba la tip kyrteng kum Sofidur Islam, 42 snem ka rta.
Kawei ka kynthei ka la ujor sha ki Pulit ha ka 17 tarik, Nailar, ha ka por kumba 7.30 baje janmiet, uwei u runar bym lah ban ithuh u la lute ïa ka pisa jong ka T. 16,000 hajar bad ïa ka mobile phone bad pyrshang ruh ban ksih ïap ïa ka da ka jingtmu ban pynïap ïa ka ha Moopynieiñ, Tyrshang, West Jaiñtia Hills.
Ha kaba ïadei bad kane ka jingjia, ki Pulit ki la ïoh kem ïa u briew ba la tip kyrteng kum u Daribok Myrsing.
Ka Embalish A Sangma ka la ujor sha ki Pulit ban pyntip ba ha ka miet 16 tarik Nailar, ki runar bym lah ban ithuh ki la tuh lai tylli ki masi ba la set ha sem ha phyllaw iing ha Songsak Agalgre, East Garo Hills.
Hadien kata, tang shu ïoh jingtip, ka nongujor ka la leit bran bran sha dukan die doh masi kaba don ha iew Nanpara, East Garo Hills bad ithuh ruh ba ïa uwei na ki masi ba la tuh na ka sem jong ka. Hynrei u nongdie doh, ba la tip kyrteng kum u Sengnat M. Sangma, u la kam trai ïa ki masi bad ong ba u la thied ïa ki masi na kawei ka briew ba la tip kyrteng kum ka Wanri B. Sangma.
Ha ka miet 18 tarik, Nailar, ki Pulit kiba la ïoh jingtip na ka tnat syntiat ki la leit khynra ïa ka iing jong u Elias Sk. ha Babupara, New Bhaitbari, West Garo Hills bad ïoh kurup ïa kawei ka motorcycle ba la shah tuh kaba don ïa u nombar ML-14-5772 kaba la long trai da u Podithson Marak.
Uwei u rangbah na kawei ka shnong ha Resubelpara, North Garo Hills u la ujor ha ka 19 tarik, Nailar ba u la ïoh pdiang ïa ka phone call na u nombar bym ithuh ha kaba uba phone u la pyntip ïa u ba ka kali jong u ka la sniew ha Resubelpara bad la buh ha ka sem kali ha Dekachang bad u briew uba phone u la kyrpad pan pisa kylliang T. 73,000 hajar da kaba kular ba siew tam T. 80,000 bad ka sut ïa kaba ym shym la siew satia kumba u kular.
U rangbah uba siew ïa ka pisa hadien ba u la sngewthuh ba u la ngat ha ka jingshah shukor u la ujor sha ki Pulit.
