Shillong, K’lyngkot, 13: Kawei ka karkhana shna tusok lane Mattress ba la long trai da u Adarsh Jujunwala ïa kaba la tip kyrteng kum ka Ummadat Foam Industries kaba don ha ka shnong Amjok, Byrnihat, Ribhoi District ka la pluh kynsan na ka jingkem ding ka Machine katba ki nongtrei ki dang ot ïa ka tusok thiah kaba la shna ha kane ka Karkhana. Kane ka la jia ha ka sngi Baar ha ka por kumba 3:00 baje noh phai sngi katba ki nongtrei ki dang shu dep bamja sngi.
U trai jong ka karkhana u la ïathuh ba ka jingpluh ka la sdang na kawei ka ka Machine ba pyndonkam ban ot ïa ki Foam ha kaba ka ding ka la klang haduh ba la bam duh syndon ïa ki jingdon jingem kiba don hapoh ka Karkhana.
Ki Pulit ka tnat pynlip ding na Byrnihat Police Outpost bad ki Kali pynlip ding na Narbong bad na Assam ki la wan poi mardor ban pynlip ïa ka ding kaba la klang bad ka jingjulor ha kane ka karkhana ka la antad ba ka la kot da ki klur tyngka.
U Rangbah Shnong ka Amjok u Bah Raju Jyrwa, u la pynpaw ïa ka jingsngewnguh ïa ki paidbah nongshong shnong kiba la ïarap ban tem ïa ka jingklang jong ka ding bad khamtam ïa ki pulit ka Byrnihat bad ki tnad pynlip ding kiba ki la poi ha ka por kaba biang ban pynlip ïa ka ding.
