Shillong, Jylliew, 25: Ka Anti-Narcotics Task Force (ANTF) ka la ïoh kem ïa ki lai ngut ki snar khaïi drok ryngkat bad u drok ha nongbah Shillong. Ïa kine ki snar khaïi drok la ithuh kyrteng kum u Rohit Mattu, u Ansh Sher Gill ba ju khot sin Suraj Gill, bad u Raman Raina.
Katkum ka jingpyntip u Superintedent of Police ka ANTF u Jagpal Singh Dhanoa, ki Pulit ki la pynlong ïa ka jingkhynra hadien ba la ïoh jingtip kaba bniah na ki tnat syntiat, ha kaba la ïohkem shwa ïa u Rohit Mattu na Cantonment Area. Ha ka jingtalasi ba la lamkhmat da u S.I Pradeep Das bad ki Pulit ka ANTF PS ryngkat ka jingdon lang jong ki nongsakhi la ïoh kurup 10.26 gram u drok heroin na ka jaka sah u Rohit Mattu.
Ha ka jingtohkit, u Rohit Mattu u la phla ba u dei u nongpyndie jong u Suraj Gill, uba dei u snar nongkhaïi drok ba heh tam ha Cantonment bad ha ki jaka ba marjan. Ki Pulit ki la kem ïa u Suraj Gill bad ka jingtohkit u la phla ba u ju pyndonkam ïa ka dukan die tiar kum ka ktem ban leh ïa ki kam beaiñ.
Shuh shuh ha ka jingtohkit, ki Pulit ki la kem ïa u Raman Raina bad u la phla ba u Suraj Gill u la wai ïa kawei ka ïing ha ka thain Raid Laban ha ka kyrteng jong u Rohit Honda, ha kaba la buhrieh ïa u drok. Ki Pulit kiba la leit khynra ïa kane ka ïing sah wai ki la ïoh ban kurup 152.26 gram u drok heroin.
Haduh 162.52 gram u drok heroin la ïoh ban kurup bad u Rohit Honda uba donkti lang ha kane ka kam be-aiñ u dang phetrieh ban lait na ka kti jong ki Pulit.
