Shillong, Jylliew, 30: Ki shipai BSF kiba ap pahara ha Border Out Post (BoP) Pyrdiwah, East Khasi Hills ha ka 26 tarik mynta u bnai ha ka por kumba 6.45 baje janmiet, ki la ïoh bat ar tylli ki kali Maruti 800 kiba kit ïa ki 8 ngut ki briew kiba dei ki nongshong shnong jong ka shnong Maungdaw, na ka ri Myanmar.
Ha ka ejahar ba la mudui sha ki Pulit, ki shipai BSF ki la pyntip ba kine ki phra ngut ki nong Myanmar ki dei kiba la tip kyrteng kum u Md. Safi (26 snem), u Md. Jamil Mohammad, ka Mustakina (19 snem), ka Noor Hasina, ka Ridwana (19 snem), ka Hamida Begam (40 snem) kynthup arngut ki khunlung, uwei uba dang shi snem u khun jong ka Noor Hasina, bad iwei i kynthei ba dang 7 bnai, i khun kynthei jong ka Mustakina.
La pyntip ba kine ki 8 ngut ki la shong da kine ki kali ryngkat bad ki saw ngut ki nong India kiba la tip kyrteng kum u Manoj Sharma (25 snem), u Ricky Pathaw, u Ajay Kurbah bad u Vishal Das.
