Shillong, K’lyngkot, 29: Ki shipai BSF jong ka 4th Battalion ha ka sngi Baar kiba la ïoh jingtip na ki tnat syntiat ki la pynlong ka jingap ktem ban pynpulom ïa ka jingpyrshang shalan tuh da ki snar nongkhaii ha khappud ka Indo-Bangladesh ha East Khasi Hills District.
Ha ka jingap ktem ki shipai BSF ki la ïoh bat ïa ki saw ngut ki mynder Bangladeshi bad uwei u nong India uba dei u nongñiah kali bad kawei ka kali Maruti Alto ha GRIEF.
Ki saw ngut ki mynder Bangladeshi ki la phla ba ki la rung beaiñ sha u pud u sam jong ka ri India naduh khyndiat bnai mynshwa. Shuh shuh ki la phla ba ki la trei kum ki nongsuhjaiñ ha Bangalore bad ki la pyrshang ban leit phai biang sha ka ri Bangladesh da kaba shu prong tuh na khappud.
Kine ki saw ngut ki mynder Bangladeshi ki dei kiba shong basah ha ka shnong Narayanganj, Bangladesh.
Ïa ki mar bad ïa ki san ngut kiba la shah kem la aiti noh sha ki Pulit jong ka Pynursla Police Station ban pynlong shuh shuh ïa ka jingtohkit kaba bniah bad leh katkum ki kyndon jong ka aiñ.
