Shillong, Naitung, 23: Ha ka jingkhynra lang, ki shipai Border Security Force (BSF) bad ki Pulit ka Jylla ki la ïoh ban pynpulom ïa ka jingthmu ban khaïi tuh ïa ki masi ha ka sngi Balang. Haduh 76 tylli ki masi ba kynthup 43 tylli kiba im bad 33 tylli ki ïap la ïoh ban kurup shwa ba ki snar khaïi tuh kin ïoh ban shalan sha ka ri Bangladesh.
Hynñiew ngut ki nong India kiba donkti ha kane ka kam beaiñ ki la shah kem bad uwei na ki u la mynsaw malu mala ha ka jingïapynibor bad ki shipai bad Pulit.
Sang tylli ki kali bad lai tylli ki Walkie-talkie Set la ïoh ban kurup kaba pynpaw ba kine ki snar nongkhaïi tuh ki la pyndonkam ïa ka rukom treikam kaba shyrkhei bha ha ka kam khaïi tuh.
Ka jinghiar jong ki kali sha khappud ka long la ka jong ka por, kaba pyni ba ki snar nongkhaïi tuh ki la don lypa ka jingïasuhbuit.
Ki snar nongkhaïi tuh kim shym la lah satia ban pyni ïa ki kot ki sla kiba biang ban pynthikna ïa ka ka jinglong trai ne ban kit ïa ki masi. Ïa ki masi ba la kurup bad ïa ki briew la aiti noh sha ki Pulit ban pynlong shuh shuh ka jingtohkit kaba bniah.
