Shillong, Jymmang, 03: Ki shipai BSF Meghalaya ha ka sngi Saitjaiñ kiba la ïoh jingtip na ki tnat syntiat da ka jingïatreilang bad ki bor Pulit ki la ïoh bat ar ngut ki nong India bad ar tylli ki kali ba la thep ïa ki mar kiba shongdor palat T. 3 lak ïa kiba la thmu ban shalan tuh sha ka ri Bangladesh lyngba ka khappud jong ka East Khasi Hills.
Ïa ki arngut ki nong India bad ïa ki ar tylli ki kali la aiti noh sha ki Pulit jong ka Dangar Police Out Post ban leh ïa kaba donkam katkum ki kyndon jong ka aiñ.
Ha kawei pat ka jingkhynra, ki shipai BSF ki la ïoh ban pynpulom ïa ka jingthmu ban khaii tuh ïa ki masi da ka jingïoh pyllait im 12 tylli ki masi najan khappud.
Ïa kine ki masi la thep ha ki ar tylli ki kali ïa kiba la thmu ban shalan tuh sha ka ri Bangladesh.
Ïa ki masi bad ïa ki kali ba la ïoh kurup la aiti noh sha ki Pulit ban leh ïa kaba donkam katkum ki kyndon jong ka aiñ.
