Shillong, Naitung, 24: San ngut ki mynder Bangladeshi kiba rung tuh shapoh u pud u sam jong ka ri India da ka jingthmu ban leit wad kam bylla sha Chennai ki la shah kem ha ki shipai BSF kiba hap pahara khappud jong ka East Jaiñtia Hills.
Kine ki san ngut ki kynthup ïa ar ngut ki shynrang, arngut ki kynthei bad kawei ka khynnah kynthei.
Kine ki mynder Bangladeshi ki la ngat ha ka kti jong ki shipai BSF ka 172nd Battalion, Meghalaya Frontier ha ka sngi Palei hadien ba ki shipai ïada khappud ki la ïoh jingtip na ki tnat syntiat ba ki don ki briew kiba rung tuh na khlaw ha khappud.
Ka tnat shipai BSF ka la pyntip ba ki shipai kiba ïaid pahara ha khappud tang shu ïohi ïa kine ki mynder Bangladeshi ki la khang kdong katba ki dang rieh hapdeng sañium hapoh ka jingdum jong ka miet.
Ïa kine ki san ngut ki shipai BSF ki la aiti noh sha ki bor Pulit ban leh ïa kaba donkam katkum ki kyndon aiñ bad ban pynlong ïa ka jingothkit kaba bniah.
