Shillong, Nailar, 10: Ki paidbah kiba la ïohkem ïa uwei u nongdih drok ba la tip kyrteng kum u Ricky Kshiar ha ka sngi Palei jong ka taiew baladep ha ka por 6.20 baje mynstep ki la leit aiti ha ki Pulit ka Nongmensong OP bad pyntip ruh da ka ktien ba une u nongdih drok u la dung pynmynsaw ïa u Bah Andreas Nongbri ha Dongkamon, Shillong.
Ïa u Bah Andreas uba la mynsaw la pynkit noh sha Nazareth Hospital, Shillong, katba ïa u Ricky Kshiar la rah sah Civil Hosital, Shillong.
Hadien kane, u Bah Wanstar Marweiñ u la leit pynrip sha ki Pulit ba ma u ruh u la ngat ha ka jingshah thombor ha u Ricky Kshiar ha ka Dongkamon, Shillong.
U Head Teacher jong ka Tirot Sing Memorial Govt., LP School, Nongkhlaw, Eastern West Khasi Hills u la ujor sha ki Pulit ban pyntip ba ha ka miet 4 bad 5 tarik ki runar ki bym lah ban tip ki prong tuh hapoh ka kamra buh tiar jong ka skul bad rong tuh ïa ki marbam kiba shongdor kumba T. 4,000 hajar.
U Nilesh Tibrewalla u la ujor sha ki Pulit ban pyntip ba ha ka 5 tarik mynta u bnai ha ka por 5.15 mynstep, ki runar bym lah ban ithuh ki la pynjulor ïa ka kali jong u bad tuh ruh ïa ki music system, bad kiwei pat ki tiar.
U Kadir Ali u la ujor ha ka 1 tarik mynta u bnai uwei u briew uba kyrteng u Ganesh u la shim kylliang ka pisa kumba T. 40,000 na ka bynta ban thied ïa ki mar jot da kaba kular ruh ba un pynphai noh ïa ka pisa, hynrei haduh mynta utei u briew u khlem pynphai satia ïa ka pisa.
U Akash Shil u la ujor ba ha ka 4 tarik mynta u bnai ha ka por 4:00 baje janmiet ki runar bym lah ban ithuh ki la tuh ïa ka laptop napoh ka ïingsah jong u kaba ha Khliehriat West, East Jaiñtia Hills.
