Shillong, Lber, 26: Arngut ki briew ki la shah kem ryngkat bad ki tiar siat lem bad ka doh hati na kawei ka shnong kaba hap ha Ri Bhoi district.
Ïa u Bah Qurenius Muktieh, 27 snem bad u Bah Jethril Umbah 32 snem la ïoh bat nyngkong eh da ki nongshong shnong ka Mawpdeng hajan khappud Assam-Meghalaya kaba hap hapoh ka Umsiang Out Post jong ka Ri-Bhoi District ha ka miet sngi Baar. Na kine ki arngut ki la ïoh kurup ruh ar tylli ki suloi shna hi bad ka doh hati, la ong ki Pulit.
Ïa kine ki arngut ki briew la ïalam medical examination bad ïa ki tiar siat kynthup ka doh hati la kurup noh na ka bynta ban phah sha ka Forensic Science Laboratory ban leh eksamin, la pyntip ki Pulit.
Ki ophisar ka tnat Forest kaba hap hapoh ka Sonapur Range, Kamrup East Division, Basistha, Guwahati ki la pyntip ba ar tylli ki hati ki la ïap naduh u bnai Naiwieng, 2024 ha kaba nyngkong eh la ïoh jingtip ïa ka jingïap uwei u hati ha ka 16/11/2024 bad ha ka sien kaba ar la lap sa ïa ka met ïap hati ha ka 18/03/2025 bad la suba ba kitei ki arngut ki dei kiba donkti ha ka jingpynïap ïa kine ki ar tylli ki hati.
Ha kaba ïadei bad kane, ki Pulit ki la register case ha Khanapara Police Station bad ka jingtohkit ka dang ïaid shakhmat.
