Shillong, Naitung 14: Ki Pulit ka kynhun Anti-Narcotic Task Force (ANTF) ka South West Garo Hills District ki la ïoh kem ïa lai ngut ki snar nongkhaïi drok ha ka shnong Borkona kaba bap hapoh ka Ampati Police Station bad na kine ki nongkhaii drok ki Pulit ki la ioh kurup haduh 11,000 tylli ki dawai kuli Methamphetamine Yaba kiba khia 1.06 kilograms.
Nalorkata, ki Pulit ki la ïoh kurup ruh lai tylli ki mobile phone bad ar tylli ki thuk thuk.
Kine kiba la shah kem ha ki Pulit ki dei kiba la tip kyrteng kum u Mostafa Sheik 24 snem, u Meter Ali 32 snem bad u Nur Abdin 24 snem. Kine baroh ki dei na ka jylla Assam.
Ki Pulit ki la register case hapoh Ampati Police Station hapoh ka kyndon jong ka Narcotic Drugs and Psychotropic Substances (NDPS) Act, ha kaba ïadei bad kane ki Pulit ki la ong ba ka jingtohkit ka la dang ïaid ban lap shuh ïa kiba donkti.
Ha kajuh ka por ki Pulit ki la kyntu ïa ki paidbah ba lada don kano kano ka jingtip ba ki don ki nongkhaïi beaiñ kin sngewbha ban pyntip sha ki Pulit ban lah ban pynduh ïa kane ka jingkhaïi beaiñ kaba sniew.
