Shillong, Ïaïong, 11: Hynriew ngut ki briew ki la shah kem ha ki Pulit halor ka jingkynnoh ba ki dei kiba donkti ban wiang ding ïa ki ïing iing ha ka shnong Mawriang, ka shnong kaba don sharum Pynursla bad kaba hap ha Pynursla Police Station.
U Superintendent of Police ka East Khasi Hills u Bah Vivek Syiem u la pyntip ba ki hynriew ngut kiba la shah kem ki dei kiba la tip kyrteng kum u Abenstar Khongmawloh, 22 snem uba ju khot sin kum u Shreng, u Bahkerlang Pohshna 23 snem uba ju khot sin kum u Banker, u Batskhem Kupar Pohshna, 27 snem uba ju khot sin kum u Be, u Ïaraplang Khongmawloh 25 snem, u Rymmang Khongmawloh, 33 snem bad u Lursing Khongjee 21 snem ka rta. Kine ki hynriew ngut ki dei na ka shnong Mawriang.
Ki Pulit ki la register case pyrshah ha Pynursla Police Station bad la pynngat ha ka kyndon 329(4), 351(3), 326 (g), 324(5), bad 3(5) jong ka BNS.
Ïa kine ki hynriew ngut la kem ha ka 9 tarik mynta u bnai bad ha kane kajuh ka sngi ki Pulit ki la tian bishar ha Kashari bad ka Kashari ka la hukum ban set 14 sngi ha Judicial Custody na ka bynta ban pynlong ïa ka jingtohkit kaba bniah.
Kum ban shu pynkynmaw hangne, ka jingshah kem jong kine ki hynriew ngut ka dei halor ka jingkynnoh ba ki donkti ban thang ïa ki iing jong ki khun ki ksiew u Bah Bistok Khongstia ha ka 8 tarik mynta u bnai ha ka por 8:00 baje mynmiet hadien ba la kynnoh ba u dei uba beh menshohnoh.
