Shillong, Jymmang, 17: Ka Jyoti Malhotra, kaba ju thoh bha shaphang ki kam shangkai suwari ha rynsan social media (travel blogger), kaba la leit sha Pakistan ar sien ha u snem 2023, ka pynïaid ïa ka “Travel with Jo” ka la shah kem ha ki Pulit ka Haryana halor ka jingkynnoh ba ka dei kaba ïadonkti bad ka kynhun syntiat na ka ri Pakistan.
Ka Malhotra kaba dei na ka shnong Hisar ka la shah kem halor ka jingkynnoh ba ka dei ka nongsyntiat bad phah ruh ïa ki jingtip ba kongsan sha ki bor syntiat ka ri Pakistan. Kane ka dei ka sien kaba lai kaba ki Pulit ka Haryana kin kem ïa ki nongshong shnong mynta ka taiew hadien ba ka ri India bad ka ri Pakistan ki la mynjur ban sangeh ïasiat.
Ka Jyoti Malhotra, ka la shah kem hadien ba ka la phla ba ka la ïasam ïa ka jingtip bakongsan bad ki tnat syntiat ka ri Pakistan. Ki Pulit ki la pynngat ïa ka hapoh ka Section 3 bad 5 jong ka Official Secrets Act, 1923, bad ha ka Section 152 jong ka Bharatiya Nyaya Sanhita Act. Ka Kashari ka la aibor ban set san sngi ha along ki Pulit ba kin ïoh pynlong ïa ka jingtohkit kaba bniah.
U nongaiktien jong ki Pulit ka Hisar u Vikas Kumar u la ïathuh ba ïa ka Jyoti Malhotra la rah sha thanad bad ki Pulit ki dang pynlong ïa ka jingtohkit kaba bniah ban ïoh jingtip kaba kham bniah.
Ïa ka ejahar la rejister ha Hisar Civil Lines Police Station halor ka jingujor ba la mudui da u Sub-inspector Sanjay.
Katkum ka ejahar, la pynpaw ba ka Malhotra ka la leit rung ha Pakistan High Commission ha Delhi ha u snem 2023, ha kaba ka la ïakynduh ïa u Ehsan-ur-Rahim, ba u khot sin u Danish, uba dei u nongtrei jong ka Pakistan High Commission (PHC) ha New Delhi.
“Ka Malhotra ka la pynpaw ba ka dang don ka jingïadei bad u Ehsan-ur-Rahim ba ju khot sin u Danish bad ha ka jingleit jong ka sha ka ri Pakistan ha u snem 2023 ka la ïakynduh ïa u Ali Ehwan, uba la pynithuh ïa ka ïa ki ophisar jong ka tnat syntiat ka ri Pakistan, bad ïakynduh ruh ïa u Shakir bad ïa u Rana Shahbaz,” la pynpaw shuh shuh ka ejahar.
“Ka Malhotra ka la pynpaw ïa ka kyrteng jong u Shakir kum u ‘ Jatt Randhawa’ khnang ba ym don mano mano ba lah ban suba sniew eiei ïa ka. Hadien ba ka la wan phai na ka ri Pakistan ha u snem 2023, ka la ïai bteng ban ïakren bad ki nongtrei ka tnat syntiat lyngba ka WhatsApp, Telegram bad Snapchat,” la bynrap shuh shuh ka FIR jong ki Pulit. Ha u snem 2023 ka Malhotra ka la leit sha ka ri Pakistan haduh ar sien. Ka Malhotra ka la plie ruh ïa ka YouTube channel ba la ai kyrteng “Travel with Jo.” Ka la long ka nongai jingtip sha ka tnat syntiat kaba treikam kylleng ka Haryana bad Punjab, ha kaba ki nongtrei ka tnat syntiat ki riam dur bula ïalade kum ki Agent, ki nongpynïaid pisa bad ki nongpyntip.
U Danish, uba la shah pynbna kum u briew bym pdiang shuh da ka Sorkar India bad uba la shah beh ha ka 13 tarik, Jymmang, 2025, la kynnoh ba u la pynithuh ïa ka Jyoti sha kiba bun ki tnat syntiat jong ka Pakistani Intelligence Operative (PIO).
La kynnoh shuh shuh ba ka ju phah ïa ki jingtip ba kongsan nalor kaba phah ïa ki dur jong ka ri India ba la shon kylleng ki bynta bad nalor kata ka ju pynpaw pyrthei bha ïa ki dur jong ka ri Pakistan ha ka Social Media.
Ki nongtohkit ki ong ba ka la don jingïadei bad ka PIO bad leit ruh sha ka ri Bali, Indonesia bad u Danish.
Mynba u Danish u dang sah ha Delhi, ka la bteng ban ïatreilang bad u bad kane ka la nang pynmih shuh shuh ïa ka jingsuba sniew pyrshah ïa ka.
