Shillong, Rymphang, 22: Ki Pulit kiba la pynlong ia ka jingbuddien bad ka jingtohkit kaba bniah ki la iohkem ia ki arngut ki briew kiba la suba ba ki dei kiba donkti ban dkhat jubor ia ka jingim jong u heprit Kitdorlang Marbaniang ha ka shnong Umtangar Ri-Bhoi District.
U Superintendent of Police ka Ribhoi Jagpal Singh Dhanoa u la iathuh ba tang hadien ba la lap ïa ka met jong u heprit Kitdorlang Marbaniang ha ka janmiet 18 tarik mynta u bnai ki Pulit kim shym la shong kli kti hynrei ki la buddien ïa kane ka kam bad register case ha Patharkhmah Police Station hapoh ka Section 302 IPC.
Ki arngut kiba la shah kem ha ki Pulit ki dei kiba la ithuh kyrteng kum u Pynshailang Warjri 32 snem ka rta na ka shnong Umtangar, Ri-Bhoi bad u Banshngai Tynshong 28 snem ka rta na Nongthymmai, Lapalang, Pynursla, East Khasi Hills District bad uba shong basah mynta ha Umtangar Ri-Bhoi.
Ka jingtohkit pyrshah ia kine ki ngut ka dang iaid shakhmat khnang ban lap ia ka daw tynrai halor ka jingshah pyniap jong u heprit Kitdorlang bad ban lapksai shuh shuh ia kiwei kiwei pat kiba donkti ha kane ka kam bymman.
