Shillong, K’lyngkot, 09: Hadien ba la ïoh jingtip kaba bniah, ka kynhun ki Pulit na Khliehriat Police Station, East Jaiñtia Hills District ki la ïoh bat ïa uwei u suba uba la tip kyrteng kum u Kheiñkor Muliar, ba ju khot sin u Kheiñ, 23 snem ka rta uba sah ha ka shnong Mookympad hajan ka thaiñ Soo Kilo katba u dang niah ïa ka kali kaba don ïa u nombar ML06-A-0621.
Da ka jingdon lang ki nongsakhi, ki Pulit kiba la talasi ïa ka met jong u katkum ki kyndon jong ka aiñ bad ki la ïoh kurup kawei ka tyndong plastik Ponds ba la thep ïa u pawdar rong soh ba la suba ba u dei u Heroin, kawei ka tin duma Golden ba thylli, ar phew san tylli ki thyrnia injekshon. Ki Pulit ki la kurup ruh ïa ka kali Alto rong lieh kaba u niah bad ïa u shabi kali.
Hadien ba la pynlong ïa ka jingleh test la pynshisha ba u pawdar rong song u dei u drok Heroin uba khia 1.37 gram.
Katkum ka jingïathuh jong ki Pulit, u Kheiñkor u dei uba ju donkti ban die ïa u drok ha iew Soo Kilo bad ha ki jaka ba marjan.
Ïa u Kheiñkor la kem noh da ki Pulit bad ïa ka case la register hapoh ki kyndon jong ka NDPS Act bad mynta ka jingtohkit ka dang ïaid shakhmat.
