Shillong, K’lyngkot, 23: Ki Pulit ka Special Operation Team (SOT) East Khasi Hills District ha ka jingkhynra ha ka miet shiteng synnia ka sngi Palei ki la ïohkem ïa uwei u briew uba la tip kyrteng kum u Edward Maiong, 37 snem ka rta uba byrngem ban pynbthei bom bun jaka ha nongbah Shillong.
Kane ka la jia lai sngi shwa ba ka jylla Meghalaya kan rakhe ïa ka Republic Day ryngkat lang bad ka ri India baroh kawei ha ka 26 tarik mynta u bnai.
U Superintendent of Police ka East Khasi Hills u Bah Vivek Syiem ha ka jingïakren bad ki lad pathai khubor u la ïathuh ba ha ka sngi Balang ha ka por 6:19 baje janmiet, uwei u briew u la ïoh pdiang ïa ka SMS lyngba ka mobile phone na uwei u nombar uba byrngem ban buh ïa u bomb bun jaka ha nongbah Shillong. U nongphah ïa ka SMS u la pynithuh ïa lade ba u dei u dkhot jong ka ‘Ri-Bhoi gang’.
U SP u la ïathuh ba tang shu ïoh pdiang ïa ka ejahar ki Pulit ki la register case ha Sadar Police Station hapoh ka Section 351(4)/353(2)/61(2) bad 113(2)(b) jong ka aiñ BNS.
“Mar mar ki Pulit jong ka Special Operation Team (SOT) ka East Khasi Hills ki la pynlong ka jingthwet kaba jur da ka jingïarap lang jong ki Pulit na ki district ba marjan,” la ïathuh u SP.
“Ha ka jingthwet kaba jur ha ka miet shiteng synnia ka sngi Palei, la lah ban ithuh ïa uba donkti bad ka kynhun Special Operation Team (SOT) ka la lah ban ïoh kem suk ïa u Edward Maiong, 37 snem ka rta na ka iing kaba u sah shipor ha Lower New Colony Laitumkhrah,” la bynrap u SP.
Ka mobile phone kaba u Bah Maiong u la byrngem ban pynbthei bom la kurup noh da ki Pulit.
Haba kylli, u SP u la ong, “ym lah ban kyntait ïa ka jingïadei jong u bad kano kano ka kynhun kieng atiar ha kum kane ka por namarba ki don ki sakhi pyrshah ïa u.”
Ki Pulit ka East Khasi Hills ki la pynlong ïa ka jingtalasi ha baroh ki lad ha ka nongbah kynthup ruh ka jingpynkhlaiñ ïa ka jingpahara hapoh ka District ban tem ïa kino kino ki jingpyrshang ban pynthud ïa ka jingrakhe Republic Day bad ïa ka shongsuk shongsaiñ hapoh ka Jylla.
Ha kaba ïadei bad kane, ki Pulit ki la pan ruh ka jingïatreilang na ki bor Pulit bad na ka bynta kino kino ki jingpyntip ba kyrkieh ki paidbah ki lah ban pyntip sha ki thanat bajan tam bad ha ka Police Control Room lyngba u mobile nombar +91 6009196479 ne da kaba telephone ha u nombar 112 ban ïoh jingïarap marmar.
