Shillong, Naitung, 28: Ki Pulit jong ka South West Khasi Hills District ki la ïoh kem sa ïa uwei pat u briew halor ka jingkynnoh donkti ba u dei uba donkti ban leh be-ijot bad ban pynïap ïa kawei ka heprit ba dang 12 snem ka rta kaba la jia saw snem mynshwa.
U Superintendent of Police jong ka South West Khasi Hills, Bah B. Jyrwa u la pyntip ba katkum ka jingtohkit ïa u Modu Sangma, uba la shah kem ha ka 20 tarik Naitung, 2025 la lap ba u Modu Sangma u la leh ïa kane ka kam bymman da ka jingbthah jong u Ratan Das, uba sah ha ka shnong Borsora uba dei ruh u nongsumar jong ka heprit.
U SP u la ïathuh ba u Ratan Das u la leh beijot ïa ka heprit kham mynshuwa bad u la siew pisa ïa u Modu Sangma ban pynïap ïa ka heprit katba u dang leit sha la ka jong ka shnong sha Assam. Hadien kata u Modu Sangma u la phet krad na Borsora, ki Pulit ki la kem ïa u Ratan Das ha ka sngi Saitjain na Borsora.
Katkum ka jingïathuh jong ki Pulit, ha ka 6 tarik, Lber, 2021 kawei ka heprit, 12 snem ka rta ka la jah rngai na la iing ha ka shnong Borsora kaba hap hapoh Ranikor Civil Sub-Division, South West Khasi Hills District ha ka por kumba 5:00 baje janmiet hynrei la lap ïa ka met jong ka ha ka sngi kaba bud bad ha ka post mortem la pynthikna ba ka la shah batbor bad shah pynïap.
U SP u la ïathuh ba ha kaba nyngkong la suba ïa u Modu Sangma namarba u la phet rieh bad ym lap dien shuh ïa u ha katei ka por bad ki Pulit ki la thwet ïa u bad khatduh ki la lap ïa u ha ka 20 tarik, Naitung 2025 na Byrnihat, Ri Bhoi District.
