Shillong. Lber 19: Sa uwei u briew u la shah kem ha kaba ïadei bad ka jingjia pynbthei bom IED hapoh ka 9 tarik mynta u bnai ha Them ïew Mawlong, ong ki pulit ha ka sngi Baar.
Une uba la shah kem la tip kyrteng kum u Namphyrnai Lyngdoh Peiñlang uba la 21 snem ka rta na ka shnong Peiñlang. La kem ia une u samla na Mairang, Eastern West Khasi Hills bad la wan ïalam noh sha Shillong ha ka lah Sngi u Blei.
“Da ka jingïarap jong ki Pulit ka Mairang bad ki Pulit ka Ri Bhoi, ngi la ïoh kem sa uwei uba la shah suba jur halor kane ka jingjia,” ong u SP ka East Khasi Hills u Rituraj Ravi.
U la ïathuh ba une uba la shah kem u donkti bha bad ki dkhot ka seng kieng atiar Hynñiewtrep National Liberation Council (HNLC).
Lah ban pynkynmaw ba ha ka 11 tarik mynta u bnai, u Tarson Lymba uba la 58 snem ka rta, uba dei u nongïalam ka seng HNYF, u la shah kem napoh Dawki katba ïa u Ebakordor Nongpluh ba la 26 snem ka rta na Shillong na ka thaiñ Malki ha kaba ïadei bad katei ka jingjia shah pynbthei bom.
Shuh shuh, ki Pulit ha ka 12 tarik mynta u bnai ki la pynpulom ïa ka kynhun barieh (Sleeper Cell) jong ka HNLC kaba la pyrshang ban pynbthei bom IED biang hapoh Sor Shillong bad Nongpoh.
Kumba 4 ngut ki dkhot ka kynhun ki la shah kem napoh ka thaiñ Ri Bhoi district. Ia ki la ithuh kyrteng kum u Damanbha Ripnar ba ju khot sin u Shall Lapang, u Robinis Ripnar, u Jill Tariang bad u Shining Nongrum.
Hadien kane, ka HNLC ha ka 14 tarik mynta u bnai, ka la kam ba ka la donkti ha kaba ïadei bad ka jingjia pynbthei bom IED ha ka 9 tarik mynta u bnai ha Them Metor, ha Them Ïew Mawlong bad ka aipor ruh shi bnai ïa ka sorkar jylla ban pynkynriah noh ïa ki 342 tylli ki longïng kiba sah hapoh ka Sweepers’ Colony.
Haba kylli, u SP u la ong ba ki Pulit ki la pynkhlaiñ bha ïa ki bor pahara hapoh ka nongbah Shillong bad ha kylleng jong ka district.
