Shillong, Jymmang, 25: Uwei u mynder Bangladeshi bad arngut ki bar jylla nong India ki la shah kem ha ki Pulit ha ka shnong Sohra, East Khasi Hills District ha ka sngi Saitjaiñ.
Lyngba ka jingïoh jingtip na ki tnat syntiat, ki Pulit ka Sohra Police Station ki la pynlong ka jingtalasi kali ha ka por janmiet bad ha ka por kumba 4 baje janmiet, ki la pynsangeh ïa kawei ka kali Maruti A-Star rong rupa kaba don ïa u nombar AS-01-AP 0928. Hynrei u nongñiah jong ka kali u la tynrah ïa ka jingker bad pyrshang ban phet krad ban lait na ka kti jong ki Pulit. Ki Pulit kiba la kthong ïa ka kali ki la ïoh khang kdong hajan Seven Sisters Falls Viewpoint, la ïathuh u Superintendent of Police ka East Khasi Hills u Bah Vivek Syiem ha u kyrwoh ba la phah sha ki lad pathai khubor.
Ïa u nongñiah bad ïa kiba shong hapoh ka kali la ïalam sha Sohra Police Station ha kaba la shem ba uwei na kiba shong hapoh ka kali u dei u mynder Bangladeshi uba la tip kyrteng kum u Robiul Islam (32 snem), u nongshong shnong jong ka Tengra Khali, Paderhat, Pirojpur, Bangladesh. U dei uba trei kum u Electrician ha Bangalore bad u thmu ban leit phai noh sha ka ri Bangladesh.
Ka paw kumba u Islam u ju pyndonkam ban ïaid lynti na khappud manla ka por, la ïathuh u SP bad bynrap ba ki arngut ki nongkdew lynti kiba la shah kem ki dei kiba la tip kyrteng kum u Sujit Hajong (32 snem) bad u Ravi Singh (38 snem), kiba dei na ka shnong Ichamati. Kine ki arngut ki dei kiba ju ïarap ïa u Islam ha ka leit ka wan.
Ka jingtohkit ka dang ïaid shakmat khnang ban ïoh shuh shuh ïa ki jingtip kiba bniah. Ïa ka case la register hapoh ka ‘The Foreigners Act, la ïathuh u SP.
Dang shen ka Khasi Students Union (KSU) South Khasi Hills District Unit ka la dawa ïa ki bor ba dei khmih jong ka Sohra Civil Sub-division halor ka jingïoh ujor na ki nongshong shnong halor ka jingkynnoh ba ki ju don ki bar jylla kiba buhai shnong ha Ichamati ki ïarap ïa ki mynder Bangladeshi ban wan rung be-aiñ sha u pud u sam ka ri India.
