Shillong, Jymmang, 30: Kumba 50 ngut eiei ki briew ki la kem pang kynsan ha Sohïong bad la suba ba ka jingkem pang jong ki ka dei namarba ka jingngat bih ha ka bam lane kata kaba ki ong ka Food Poisoning. Ki briew kiba kem pang ki dei kiba la bam ïa ka bam ha ka jingkhawai ïa ka jingrakhe Golden Jubilee jong ka Sohïong Presbyterian Secondary School. Kiba bun mynta ki don hapoh CHC Sohïong bad don ruh kiba leit ban shim dawai na kiwei pat ki doktor.
Ban pyntikna ïa kane, ka Batesi Tv ka la ïoh ban ïakren lyngba ka telephone bad u Principal jong katei ka skul u Babu Remi Nongrang bad ha ka por ba ngi ïakren bad u, u la ïathuh ba ka don ka jingkem pang jong ki briew hynrei u dang don ha lynti ban leit sha CHC bad haduh mynta um pat lah ban batai eiei. Kiwei pat ki tyllong khubor ki la ïathuh ba u MLA ka Sohïong u bah Synsharkupar Lyngdoh Thabah ruh u la kem pang bad la pynkit ïa u sha Shillong.
