Shillong, Lber, 04: Ki nongpeit nongkhmih jong ka kudam pynmih Atta, Moida ba la tip kum ka Magic Cook kaba don hakhmat ka surokbah Guwahati-Shillong ha Garikhana ha ka Lah Sngi u Blei ki la hap ban ot noh ia ki nar ba la sieh ha ka lynti iaid kjat ia kiba ba la thmu ban ker da ka tin khnang ban iada ia ki nongiaid nongieng bad ia ki kali katba ka jingshna thymmai ia ka kudam ka dang iaid shakhmat.
Kum ban shu pyntip hangne, ka kudam Magic Cook kaba don ha Garikhana kaba la long trai da u Sanjeev Kumar ka dei kaba dang hap hapoh ka jingkhmih jong ka Dorbar Shnong Them Mawbah ka la kylla pdei ha ka 1 tarik, u Nohprah, 2023.
Ki nongbylla ha ka jingiakren bad u Nonglum khubor ka Batesi TV ki la iathuh ba ki la shu sieh hi ia ki nar jingker ha ka lynti iaid kjat da ka jingthmu ban ker da ki tin hynrei kaba la wanrah pat ia ka jingthud ha ka iaid ka ieng jong ki paidbah.
Ha kaba iadei bad kane ki nongkitkam shnong jong ka Dorbar Shnong Them Mawbah kiba la leit jurip ia kane ka jingker ki la aipor hapoh hynniew sngi ban weng noh ia kine ki jingker nar na ka lynti iaid kjat.Ka jingsieh ia ki nar ha lynti iaid kjat ka la pynlyngngoh lut ia ki paidbah nongleit nongwan namar ka jingbym don satia mano mano ruh ban kynthoh ia kane ka jingkyntur pud u trai ka Magic Cook sha lynti iaid kjat.
