Shillong, Nailur, 15: Ka Meghalaya Pradesh Mahila Congress (MPMC) ka la pynrem jur halor ka jingshah pynïap dusmon i heprit Insaphira 4 snem ka rta ha ka shnong Nongrah, Shillong ha kaba ïa ka met jong i la lap ha ka step Lah Sngi u Blei ha ka shnong Nongrah hadien ba i la jah rngai na phyllaw iing ha ka step Sngi u Blei.
“Kum kine ki jingjia ka long kaba sngewsih bad kaba pynkyndit ïa ki nongshong shnong jong ka jylla Meghalaya,” ong ka President jong ka Mahila Congress ka Kong Joplyn Scott Shylla ha u kyrwoh ba la phah sha ki lad pathai khubor.
Ka Mahila Congress ka phah ïa ka khubor sngewlem sha ki bahaing hasem jong i heprit Insaphira.
“Kane ka jingjia ka la pynsheptieng bad pynsyier mynsiem khamtam ïa ki kmie ki kpa bad ïa ngi kum ki nongshong shnong ka jylla Meghalaya. Ka jingkiew stet jong ki kam sniew kam ka kam tuh, kam pynïap briew, ki kam runar balewphewjait laiphew rukom ba manla ka sngi bad ka jingbymshong suk shongshngaiñ shuh ka shnong ka thaw ka pyn tieng ïa ngi ki paidbah,” la ong ka President jong ka Mahila Congress.
Ka Mahila Congress ka kyntu jur ïa ka Sorkar Meghalaya ba kan shimkhia halor ki kam runar kiba lah jyllei ha kane ka jylla.
“Ka Sorkar ka dei ban buh hakhmat eh ïa ka bha ka miat jong ki paidbah bad ym ban pynleit jingmut tang ha ki tamasa ba har rukom tang ban pynbyrngia ïa ki paidbah ba kin lait ban pynleit jingmut sha ki kam ba ktah ïa ka imlang ka sahlang. Ki jingdawa jong ka Meghalaya Pradesh Mahila Congress kaba nyngkong ka long, ban pynlong ïa ka jingtohkit kaba kham stet bad kaba khuid halor kane ka jingjia ïa i heprit bad ba ki bahaing hasem kin ïoh ïa ka hok na ka bynta i heprit Insaphira. Ka baar, ban pynkhlaiñ ïa ki jingpahara ki Pulit khnang ban khanglad ïa ki kam sniew ki kam runar ha ki shnong ki thaw,” la dawa ka Mahila Congress ïa ka Sorkar bad bynrap, “kaba kongsan eh ka long ban pyneh ïa ki aiñ halor ki briew ba shem ba ki leh be-ijot ïa ki khyllung khynnah bad ïa ki kynthei ba lah rangbah ruh kumjuh.”
Ka Meghalaya Pradesh Mahila Congress ka dawa ba ka Sorkar kan kham pynduna ïa ka jingwanrah ïa ki tamasa ba har rukom bad ban pynleit jingmut ha ki kam ban trei shitom nangne shakhmat ha kaba ïadei bad ki kam ban wanrah ïa ka lawei ba phyrnai ïa ki khun samla ki jong ngi bad ba ka Sorkar kan trei bha na ka bynta ka jingshongsuk shongsngaiñ ha ka jylla Meghalaya jong ngi hi baroh kawei, la pynkut u kyrwoh.
Katba na ka liang jong ka Khun Hynñiewtrep National Awakening Movement (KHNAM) ka la pynpaw ïa ka jingsngewkhia ryngkat ka jingbitar kaba jur halor kane ka jingjia kaba sngewsih ïa i heprit Insaphira.
“Kat dang mih ki sngi ki por ngi la sakhi ïa ka jingpur stet ki kam sniew jong ki riewthrang snam kiba la pynshong syier ïa ka jylla hi baroh kawei,” ong u kyrwoh ba la phah da u Working President ka KHNAM u Bah Thomas Passah.
“Ka Sorkar jylla kaba dei ka nongri nongda ïa ki nongshong shnong ka jylla na kum kine ki jingjia ka dei ban pyrkhat thymmai ïa ki lad ki lynti kiba hap ban shimkhia nangne shakhmat. Kawei na ki bynta jong ka Smart City, kumba ngi la ïoh jingtip ka dei ba ki shnong ki thaw kin don ruh ïa ki CCTV kiba biang kum shibynta ban ïoh jingtip kloi halor kino kino ki jingjia kiba kum kine bad ngi kyntu ïa ka Sorkar ban pyndep kloi ïa kane ka bynta khnang ba ngin lah ban khanglad nangne shakhmat. Ngi kyrmen ba ki bor Pulit kin trei borbah ban lap ïa kiba donkti bad ba ka iingkashari kan pynshitom ïa ki ha u tyllai phasi,” la bynrap u kyrwoh.
