Shillong, K’lyngkot, 07: U nongaitkien jong ka BJP Meghalaya Pradesh u Bah Mariahom Kharkrang u la ong ba ka Sorkar Jylla hapoh ka jingïalam jong u Myntri Rangbah bad u Symbud Myntri Rangbah ka jylla, dang shen ki la kyntu ïa ka Sorkar Pdeng ba kan pyntreikam noh ïa ka Inner Line Permit (ILP) ha Meghalaya ban khanglad ïa ka jingrung kyrthep jong ki briew kiba nabar bad ki mynder ri.
U Bah Kharkrang u la ong ba watla um pat ïohi satia ïa ki kyndon ba la tyrwa hapoh ka ILP, ka Sorkar ka la ïaleh shitom ban ïasyllok ruh bad ki kynhun bapher bapher.
U la kyntu ïa ki sengbhalang bad ïa kiwei kiwei ki kynhun ban wan sha ka miej jingïakren bad ka sorkar, bad bynrap ïa kiba bun ki jingeh yn sa lah ban weng tang da ki jingïakren.
Da kaba pynpaw ba ka donkam ïa ka jingshimrai kaba biang, u Bah Kharkrang u la ong ba ka dei ban don ka jingïamynjur lang khnang ban dup lah ban pynurlong ïa ka jingangnud.
Ha kaba ïadei bad ka mat lynti Rel, u la maham ba lada ka projek lynti Rel kam wan sha Meghalaya, ka Jylla hi kan ïakynduh jingeh ha ki snem ban sa wan. U la ong ba ki pateng ki ban sa wang kin sa tim ïa ki nongïalam ba mynta namar ka jingbym lah ban pynïasoh ïa ka lynti Rel, ka ban long ka lad ba kongsan ha ka roi ka par jong ka jylla.
Hynrei, u la banjur ba dei ban don shwa ïa ki aiñ kiba pyrkhing bad pynpaw ruh ka jingsngewskhem ba ka sorkar ka la trei shitom ban wanrah ïa ki lad jingïada.
U Bah Kharkrang u la kdew ruh ba ka dor jong ki mar ki mata ha Shillong ki kham rem ar shah haba ïanujor bad ha Guwahati, na ka daw ka jingrem ka bai kit. U la kdew ruh ba ka rah ka rong lyngba ki kali ha surok ka rem haduh katt katta ha ka pyrthei baroh kawei bad ong ruh ba la donkam ban wad da kiwei pat ki lad ki lynti kiba kham tad ha ka kit ka bah.
Ban pyrkhing ïa ki mynder kiba wan rung laitluid sha ka jylla Meghalaya, u Bah Kharkrang ha ka jingsngew jong u, u la ong, “ka kham suk ban talasi ïa ki mynder kiba wan da ka Rel namarba ka hap ban ieng ha manla ki steshon, hynrei ka kam jwat ban talasi ïa ki mynder kiba wan da ki kali na surok. Lada ki wan na surok ha ka por mynmiet ka buh jingeh bha.”
Haba khot ïa ka jingïatylli khnang, u la ong ba baroh ki kynhun ki dei ban ïatreilang da kawei ka jingmut kaba bha khnan ban wad ïa ki lad ki lynti ki ban pynmyntoi hi ïa ki pateng ki ban sa wan.
