Shillong, Jylliew 27: Ki bor pynïaid ka East Khasi Hills District ki la khang ïa ki kali heh ne kiba kit khia, kynthup ruh ïa ki bus Night Super, ba kin ïaid na ka shnong Demseiñïong Macabe Road.
Ïa kane ka hukum la pynmih da ka District Magistrate ka Kong RM Kurbah, ha kaba kane ka thmu ban ïada ïa ka jingjot ka surok bad kumjuh ban pynthikna ïa ka jingïada ki paidbah kiba ïaid lynti.
Ha ka hukum ka la maham ruh ba kiba pynkheiñ kin mad da ki kyndon jong ka aiñ.
Katkum ka hukum, ka jingkhim ka surok bad kaba la pynbna kum ka Urban Bituminous Road kan ym long kaba lah na ka bynta ki kali kiba heh ban ïaid naba kane kan buh ka jingma ïa kiba ïaid lynti, ki jingdonkam ban ai ki jingshakri kiba kyrkieh bad kumjuh ruh ïa ka jingpynïaid ïa ki kali ha ka shnong.
