Shillong, Shillong, 05: Ki bor synshar jong ka East Khasi Hills district ki la khang ban ïalum paidbah ne ban ïaid rally hapoh u pud u sam jong ka Mawryngkneng C&RD Block hadien ba la mih ka huri hura na ka jingkhang ïaid kali da ka Meghalaya Commercial Truck Owners and Drivers Association (MCTO&DA).
Ka District Magistrate Kong Rosetta Mary Kurbah ha ka hukum ba la pynjari ha ka sngi Balang hapoh ka Section 163 jong ka Bharatiya Nagarik Suraksha Sanhita (BNSS) ka la mana ïa kino kino ki briew ne ki kynhun ban pynlong ïa ki jingïaid paidbah hapoh u pud u sam jong ka Mawryngkneng C&RD Block, ban rah ïa ki tiar siat ne ki tiar pynmynsaw lane kino kino ki tiar kiba lah ban pyndonkam kum ki tiar pynmynsaw ïa ki briew.
Ka District Magistrate ka la mana ruh ba kino kino kiba pynkhein ïa kane ka hukum kin ngat ha ka jingshah pynshitom hapoh ka Section 223 jong ka BNS bad ha kiwei kiwei pat ki Section.
Namar ka jingkyrkieh jong ka kam, kane ka hukum kan treikam noh mador tad haduh ban da pynbna da kumwei pat.
